Сенаторлар Жамбыл облысында су шаруашылығы саласындағы кадр тапшылығын шешу жолдарын талқылады

Сапар аясында сенаторлар алдымен Қазақ ұлттық су шаруашылығы және ирригация университетінің жұмысымен танысты. Мемлекет басшысының тапсырмасы бойынша құрылған университетте 53 білім беру бағдарламасы бар, олардың арасында «Су шаруашылығы және мелиорация», «Су шаруашылығындағы гидротехникалық құрылыс» және «Су шаруашылығындағы инновациялық технологиялар» сынды бағдарламалар ұсынылған. Бүгінде оқу орнында 124 студент грант бойынша білім алуда.

Университет басшылығы биыл гидрологиялық зерттеу жұмыстарын бастау жоспарлап отыр. Алайда, оқу орнында шешілмеген мәселелер бар. Университет проректоры Ғалия Томарова депутаттарға ғылыми жұмыстарға қажетті қондырғылардың сатып алынуы қажеттігін айтып, оқу корпустарының ескіргенін және жөндеуді талап ететінін жеткізді.

Сенатор Ольга Булавкина су шаруашылығы саласындағы кадр тапшылығының өзекті мәселе екенін атап өтті. Университет басшылығымен болған әңгімеде оқу орнынан кейінгі жұмыспен қамту көрсеткіші 60 пайызды құрайтыны белгілі болды. Сенатор бұл жағдайды кадр тапшылығының айқын көрінісі деп санайды. Сонымен қатар, су шаруашылығында жас мамандардың белгілі бір аумақтарда жұмыс істеуге құлқының болмауы да бұл мәселеге әсер етуде, себебі саладағы жалақы бұрын 70-100 мың теңге көлемінде болса, қазір тек 200 мың теңгеге көтерілді, бұл да жеткіліксіз қаржы.

Сенаторлар студенттерге сапалы білім беру үшін нақты шаралар қабылдануы керек екенін айтып, қолдау көрсетуге уәде берді. Бұдан кейін депутаттар су ресурстарын тиімді пайдалану және кадрларды даярлау мәселелері жөніндегі комитеттің көшпелі отырысына қатысты.

Жамбыл облысының әкім орынбасары Әбілқайыр Тамабек облыстағы су ресурстарын тиімді пайдалану бойынша жүргізіліп жатқан жұмыстарды баяндап, бірқатар күрделі мәселелерді атап өтті. Оның айтуынша, 2019 жылдан бастап облыстың алты ауданында халықаралық банктерден алынған несие есебінен екі жоба іске асырылуда, бірақ сапасыз жобалық-сметалық құжаттамалар мен мердігерлердің жосықсыз жұмыстарының нәтижесінде жобалардың аяқталу мерзімі 2025 жылға ауыстырылды.

Комитет төрағасы Әли Бектаев су шаруашылығы саласында кадр даярлау мәселесінің алдағы бес жылда өзекті болатынын және бұл саланың 1700 маманға қажеттілігін мәлімдеді. Әли Бектаев Жамбыл облысын су шаруашылығы кадрларын даярлайтын орталық деп атады, бірақ соңғы 10-15 жылда институт жабылып қалғандықтан, қазіргі кезде мамандар басқа өңірлерде оқытылуда, бұл өз кезегінде сапа мәселесін туындатып отыр.

Бұған қоса, Әли Бектаев алдағы төрт жыл ішінде су шаруашылығын дамытуға арналған арнайы бағдарлама қабылданып, су шаруашылығы саласындағы жұмыстарды заңнамалық тұрғыда қамтамасыз ету қажеттігін атап өтті.