Қалалық пабликтер: БАҚ па, әлде жанжал арқылы табыс табатын құрал ма?
Күн сайын мыңдаған қазақстандықтар қалалық Instagram парақшаларынан жаңалықтарды оқып, қоғамдағы өзекті мәселелер туралы сол жерден біледі.
Алайда бұл парақшаларда жарияланған ақпараттың сапасы мен шынайылығы әрқашан көңіл көншітпейді. Жалған ақпаратқа қарсы іс-қимыл орталығының сарапшылары осындай парақшалардағы контенттің артында қандай механизмдер тұрғанын талдап берді.
Мамандардың айтуынша, Instagram желісіндегі көптеген қалалық пабликтер — бұл дәстүрлі бұқаралық ақпарат құралдарының толыққанды баламасы емес. Олардың басты мақсаты – нақты ақпарат тарату емес, қолданушы назарын барынша ұзақ уақыт ұстап тұру арқылы жарнама құнын арттыру.
Көп жағдайда бұл парақшалар айғайлы тақырыптар, жағымсыз оқиғалар, жанжал мен қоғамдағы дүрбелең тудыратын ақпараттар арқылы эмоцияға әсер етіп, оқырманды тартуға тырысады. Бұл құбылыс сарапшылар арасында «жанжал экономикасы» (economy of outrage) деп аталады. Оның мәні — эмоцияға толы контент арқылы қолданушылардың назарын аударып, парақшада жарнама орналастыру құнын қымбаттату.
Жалған ақпаратқа қарсы іс-қимыл орталығы бұл құбылысқа ерекше назар аударып отыр. Сарапшылар бұл бағыттағы жаңа зерттеу нәтижелерін жария етіп, «Қалалық пабликтер – бұл ақпарат құралы ма, әлде оның көшірмесі ме?» деген сұрақ төңірегінде жан-жақты жауап береді.