Шу ауданындағы үш шағынаудан сапалы ауызсумен қамтылды
Тәуелсіздік күніне орай Шу ауданы, Шу қаласына қарасты Жанқұлиев, Жайсан және Горгаз шағынаудандарының шамамен 16 мың тұрғыны сапалы ауызсуға қол жеткізді.
Осыған байланысты өткен салтанатты шараға аудан әкімі Бақытжан Жәнібеков пен аудан прокуроры Талғат Оспанов қатысты.
Ауызсумен қамту жобасын іске асыруға республикалық және жергілікті бюджеттен, сондай-ақ Арнаулы мемлекеттік қордан жалпы көлемі 3,377 млрд теңге қаржы бөлінді.
Горгаз (12 362 адам) және Жанқұлиев (2 681 адам) шағынаудандарында ауызсу желілерінің құрылысын «Интеллект-Азия» ЖШС, ал Жайсан шағынауданында (818 адам) «ТаразСтрой-2004» ЖШС жүзеге асырды.
Сонымен қатар Байзақ ауданының Төрткөл ауылында да қайтарылған активтер қаражаты есебінен жүргізілген ауызсу құрылысы толық аяқталып, тұрғындар сапалы тіршілік нәрін пайдалану мүмкіндігіне ие болды.
Мемлекет басшысының халықты 100 пайыз сапалы ауызсумен қамту туралы тапсырмасына сәйкес Жамбыл облысында жүйелі жұмыстар атқарылуда. Биыл 13,9 млрд теңгеге 24 ауылдық елді мекенде және 9 тұрғын алқапта (Тараз қаласында – 5, Шу қаласында – 4) ауызсу нысандарының құрылысын жүргізу жоспарланған.
Бүгінгі күнге дейін 19 елді мекенде және 5 тұрғын алқапта құрылыс жұмыстары толық аяқталып, тұрғындар сапалы ауызсумен қамтылды. Қамту көрсеткіші қалаларда 99,8 пайызды, ауылдық елді мекендерде 99,6 пайызды құрап отыр.
Қазіргі таңда 3 елді мекен мен 4 тұрғын алқапта құрылыс жұмыстары аяқталып, нысандарды қабылдау-тапсыру рәсімдері жүргізілуде. Ал қалған 2 нысанда құрылыс жұмыстары 90 пайызға орындалды.