Банк ұсынған болжамға сәйкес, алдағы жылы елде инвестициялық белсенділік айтарлықтай күшейеді. Атап айтқанда, өңдеу өнеркәсібі мен агроөнеркәсіп кешенінде 100-ден астам инвестициялық жоба, ал су-энергетика, көлік және цифрлық инфрақұрылым салаларында 200-ден астам жоба іске қосу жоспарланған.

Сарапшылардың айтуынша, бұл бастамалар экономиканың құрылымдық жаңаруына, өндірістік әртараптандыруға және ұзақ мерзімді тұрақты өсімге серпін береді.

Инфляция төмендеп, базалық мөлшерлеме біртіндеп азаяды

ЕАБР бағалауынша, 2026 жылы инфляция 9,7%-ға дейін баяулайды. Бұған бірнеше фактор әсер етеді:

Ұлттық банктің жоғары базалық мөлшерлемені сақтауы;

Тұрғын үй-коммуналдық қызметтер тарифтерін көтеруді кейінге қалдыру;

Ішкі нарықтағы баға қысымының біртіндеп әлсіреуі.

Осыған байланысты базалық мөлшерлеме шамамен 18% деңгейінде 2026 жылдың екінші тоқсанына дейін сақталады. Ал инфляция тұрақты төмендей бастаған жағдайда, қаржы реттеушісі оны кезең-кезеңімен қысқартуды жоспарлап отыр.

Доллардың орташа бағамы – 535 теңге

Еуразиялық даму банкі 2026 жылы доллардың орташа жылдық бағамы 535 теңге деңгейінде қалыптасады деп күтеді.

Бұл көрсеткішке келесі факторлар оң әсер етеді:

Жоғары базалық мөлшерлеменің сақталуы;

Квазимемлекеттік сектор тарапынан валютаны сату нормасының орындалуы;

Шикізаттық емес экспорт көлемінің артуы;

Төлем балансының біртіндеп жақсаруы.

2025 жылғы өсімге ішкі факторлар ықпал етті

Еске сала кетейік, 2025 жылдың қорытындысы бойынша Қазақстанның жалпы ішкі өнімі 6,5%-ға өсті. Бұл өсімге негізінен ішкі экономикалық факторлар әсер еткен.

Атап айтқанда:

Кен өндіру өнеркәсібіндегі өндіріс көлемі – 9,4%;

Өңдеу өнеркәсібі – 6,4%;

Ішкі сауда – 8,9%;

Көлік саласы – 20,4%;

Құрылыс – 15,9% өсім көрсетті.

Сонымен қатар Теңіз кен орнындағы өндірістік қуаттарды кеңейту де жалпы экономикалық өсімді жеделдетуге айтарлықтай ықпал етті.

Орта мерзімді тұрақты даму күтіледі

ЕАБР сарапшыларының бағалауынша, 2026 жылы инвестициялық жобалардың белсенді іске асуы мен шикізаттық емес сектордың үлесінің артуы Қазақстан экономикасының орта мерзімді тұрақты дамуына берік негіз қалайды.

Банк мамандары экономиканы әртараптандыру, инфрақұрылымды жаңарту және өндірістік секторды кеңейту елдің сыртқы күйзелістерге төзімділігін арттырып, жаңа жұмыс орындарының ашылуына мүмкіндік береді деп есептейді.