Министрдің айтуынша, спортшыларға арналған киім екі бағытта қарастырылған: шеру формасы және жарыс кезінде киілетін спорттық киім. Биылғы шеру формасын толықтай отандық бренд тегін тігіп берген. Сонымен қатар қоғам тарапынан айтылған барлық ұсыныс пен ескерту назарға алынған.

– Қазіргі шеру формасы спортшыларымызға ұнады. Спорт қауымдастығы да қолдап отыр. Дегенмен алдағы уақытта оны жетілдіру жұмыстары жалғасады. Жазғы Азия ойындарына арналған жаңа формаға арнайы ашық конкурс жариялаймыз, – деді министр.

Ербол Мырзабосынов биыл спортшыларды киіндіру саясатының өзгергенін атап өтті. Оның сөзінше, жарыс кезінде киілетін негізгі спорттық жабдықтар халықаралық Under Armour брендімен жасалған келісім аясында дайындалады.

– Бұл форма спортшылардың сайыс кезінде киетін негізгі киімі болады. Әр спортшыға берілетін сөмкеде 18 түрлі спорттық өнім қарастырылған. Ең бастысы, бұл киімдер бюджеттен тыс қаражат есебінен сатып алынды, – деді ол.

Министр бұрын қысқы және жазғы спорт түрлеріне бөлек форма тігілетінін, ал биыл әр спортшыға бірдей қысқы және жазғы спорттық құрал-жабдықтар толық қамтылатынын айтты.

Сондай-ақ 2026 жылы Жапонияның Нагоя қаласында өтетін жазғы Азия ойындарына арналған шеру формасы ашық конкурс арқылы іріктелетін болады.

Осылайша, Қазақстан құрамасының халықаралық ареналардағы спорттық бейнесі жаңарып, кәсіби деңгейде күшейе түспек.