Қазақстандық блогерлер 18 миллиард теңгеден аса табысын декларациялаған.
Ресми деректерге сәйкес, өткен жылы салық органдары 854 инфлюенсер мен блогерге қатысты тексеру жүргізіп, 1 586 хабарлама жолдаған. Бұған 2022–2023 жылдар аралығында 71,9 миллиард теңге көлеміндегі табыстың төмен көрсетілуі себеп болған.
Бұл туралы Мемлекеттік кірістер комитеті өкілдері мәлімдеді.
Комитеттің мәліметінше, қазіргі таңда 622 инфлюенсер мен блогер қосымша декларациялық нысандарды тапсыру арқылы 18,2 миллиард теңге табысын заңдастырып көрсеткен. Осы көрсетілген табысқа сәйкес, 875,5 миллион теңге көлемінде салық есептелген.
МКК өкілдері әлеуметтік желілер арқылы табыс табатын азаматтардың саны жыл сайын артып келе жатқанын атап өтті. Соған байланысты цифрлық платформалардан түсетін табыстарды бақылау мен салықтық әкімшілендіру күшейтілуде.
Сонымен қатар комитет инфлюенсерлер мен блогерлерге табыстарын заң аясында көрсету, декларацияны уақытылы тапсыру және салық міндеттемелерін орындау қажеттігін ескертті. Бұл талаптар сақталмаған жағдайда, қосымша тексеру мен әкімшілік жауапкершілік қарастырылуы мүмкін.
Мамандардың айтуынша, алдағы уақытта да әлеуметтік желі арқылы табыс табатын тұлғаларға қатысты бақылау шаралары жалғасады.