Қазақстан Үкіметі энергетикалық саланы дамыту аясында 2033 жылға дейін елдегі мұнай өңдеу қуатын жылына 40 млн тоннаға дейін жеткізу бағытында кешенді жұмыстар жүргізіп жатыр. Бұл туралы энергетика вице-министрі Қайырхан Тұтқышбаев Үкімет отырысында мәлімдеп, бастаманың ішкі нарықты тұрақты отынмен қамтамасыз ету және экспорт мүмкіндігін кеңейту үшін маңызды екенін атап өтті.
Оның айтуынша, қолданыстағы мұнай өңдеу зауыттарын кезең-кезеңімен жаңғырту 2030 жылға қарай дизель отыны тапшылығын жоюға мүмкіндік береді. Ал 2033 жылы қуаты жылына 10 млн тонна болатын жаңа зауыт іске қосылғаннан кейін авиакеросинге деген сұраныс толық өтеліп, К5 стандартына сай жоғары сапалы мұнай өнімдерін экспорттау жоспарланып отыр.
Сонымен бірге Қашаған кен орнында газ өңдеу инфрақұрылымы дамып келеді. 2026 жылдың соңында жаңа газ өңдеу зауыты іске қосылып, жылына шамамен 2,5 млрд текше метр тауарлық газ өндіру көзделген. Мұнай-газ химиясы саласында полиэтилен, бутадиен және карбамид өндіру жобалары жүзеге асырылып, шикізатты терең өңдеу арқылы өнімнің қосылған құнын айтарлықтай арттыру жоспарланған.
Жалпы бұл жобалар еліміздің энергетикалық тұрақтылығын күшейтіп, ішкі нарықты сапалы жанар-жағармаймен қамтамасыз етуге және болашақта экспорт көлемін ұлғайтуға мүмкіндік береді.
Ұқсас жаңалықтар
