Олимпиада чемпионы 25 ақпанға қараған түні Қазақстанға жетті. Ол мінген ұшақ елорда әуежайына сағат 01:06-да қонды. Италияда өткен қысқы ойындардың басталуынан бері Михаил Шайдоров шамамен үш апта бойы шетелде болған.

Елордада спортшыны жанкүйерлері, әріптестері, достары мен туған-туыстары күтіп алды. Қарсы алу барысында Михаил қазақстандықтарға көрсеткен қолдауы үшін алғыс айтып, ел туы ең биік тұғырға көтерілген сәтте ерекше мақтаныш сезімін бастан өткергенін жеткізді.

Салтанатты рәсімде Олимпиада чемпионына үш бөлмелі пәтердің кілті табысталды. Сондай-ақ оның жеке жаттықтырушысы Алексей Урмановқа да пәтер берілді.

Бұдан бөлек, мәнерлеп сырғанаушы Софья Самоделкина мен Ұлттық құраманың бас жаттықтырушысы Әсем Қасеноваға бір бөлмелі пәтердің кілті тапсырылды.