Созақтың қарбыздары шетелге экспортталып жатыр

Түркістан облысындағы Созақ ауылдық округінің шаруалары бірнеше жылдан бері өздері өсірген қарбыздарын Ресейге экспортқа шығарып жатыр. Түркістан облысы әкімдігі бапасөз қызметінің хабарлауынша, осы уақытқа дейін «Болыс ата», «Нұрмағанбет» шаруа қожалықтары өнімдерін шетелге экспортқа шығарған. Биыл да ауыл округтегі ең ірі «Б.Абдраманов» шаруа қожалығы осы істі қолға алды. Кеше 35 тонна, бүгін 65 тонна, жалпы 100 тонна қарбызды Новосібір облысына шығарып, сатты. Шаруа қожалығы көктемде 15 гектар жерге бақша өнімдерін еккен болатын. Оның 4 гектарына қауын, 11 гектарына қарбызды жерсіндірген. Одан бөлек, қарбызды аудан көлемінде сатуды қолға алды. Тұтынушылар сапасы жоғары қарбыздың дәмді екенін айтады. Табиғи күтіп-бапталған бақша өніміне сұраныс жоғары. «Бұл шетелдік сорттағы қарбыз, дәмі керемет. Сұраныс жоғары. Алушылардың көңілінен шықты. Биыл қарбызды экспорттауды қайта қолға алдық. Бір жыл үзіліс жасаған болатынбыз», дейді. «Б.Абдраманов» шаруа қожалығының төрағасы Зүлфия Әбдіраманова.