Бүгін, 09:45
Өнер иесі 27 наурыз – анасының туған күні екенін айтып, бұл күннің өзі үшін ерекше ауыр өтетінін жеткізді. Әнші қабір басында түсірілген видеосын бөлісіп, көпшілікке терең ой салатын әсерлі сөздер қалдырған, деп хабарлайды baq-orda.kz.
Ол жазбасында анасын сағынышпен еске алып, тірі кезінде отбасымен бірге өткізген сәттердің қадірін ерекше атап өтті. Сондай-ақ, қоғамда қабір басынан фото не видео жариялауға қатысты айтылатын сындарға да тоқталып, бұл әрекеттің мақсаты – жұртқа ой салу екенін түсіндірді.
«Бұл – өмірдің шындығы. Мәңгілік ешкім жоқ. Менің айтқым келетіні – ата-анасы жанында жүрген жандар олардың қадірін білсін. Барында бағалап, қызметін жасап, көңілін табу керек. Өйткені әке мен ана – Алланың бізге берген ең үлкен нығметі», – деген ол.
Әнші қазіргі таңда өзіне дұға жасайтын ата-анасының жоқ екенін айтып, бұл сезімнің қаншалықты ауыр екенін де жасырмады. Сонымен қатар, барша жұртқа ата-анасын құрметтеуге шақырып, өмірлік маңызды ой тастады.
Желі қолданушылары әншінің бұл жазбасына бейжай қарамай, жылы пікірлерін жаудырып, қолдау білдіріп жатыр. Көпшілік оның сөзінен үлкен тағылым алғандарын айтып, ата-ананың қадірін білу керектігін атап өтті.
