Бүгін, 15:11
Жамбыл облысында ауыл шаруашылығы үшін стратегиялық маңызы бар су арналары кезең-кезеңімен жаңғыртылып жатыр. Бұл – өңірдегі су тапшылығын азайтып, егіс көлемін тұрақты қамтамасыз етуге бағытталған нақты қадам, деп хабарлайды baq-orda.kz.
Бүгінде су арналарының ішкі қабатын бетондау жобасы облыстың бес ауданында қолға алынған. Әсіресе негізгі жұмыстар Шу ауданы аумағында қарқынды жүріп жатыр. Мұнда барлығы 45 канал бетонмен қапталып, олардың жалпы ұзындығы 277 шақырымға жетеді.
Ал бетондау қарқыны жағынан Байзақ ауданы алдыңғы қатарда. Бұл аудандағы жұмыстардың жүйелі жүргізілуі – жобаның тиімді жүзеге асып жатқанын көрсетеді.
Жалпы алғанда, биыл Жамбыл облысында егіс алқабы 665 мың гектардан асқан. Бұл өткен жылмен салыстырғанда 25 мың гектарға көп. Мұндай өсім су ресурстарын тиімді басқару мен инфрақұрылымды жаңғырту нәтижесінде мүмкін болып отыр.
Ең бастысы – қолға алынған каналдарды жаңарту жұмыстары толық аяқталған жағдайда, қосымша 51 мың гектар егістік алқапты сумен қамтуға мүмкіндік туады. Бұл өңірдегі аграрлық сектордың әлеуетін арттырып қана қоймай, өнім көлемін ұлғайтуға да жол ашады.
Су – ауыл шаруашылығының күретамыры. Сондықтан мұндай ірі инфрақұрылымдық жобалардың жүзеге асуы тек бүгінгі қажеттілік емес, ертеңгі тұрақты даму кепілі екені анық.
