Тараздық жас мұғалім «Адал тұлға-2023» ұлттық сыйлығының иегері атанды

0 29

«Сыбайлас жемқорлыққа қарсы бірінші медиа орталық» Республикалық қоғамдық бірлестігінің 10 жылдығына және 9 желтоқсан-«Халықаралық сыбайлас жемқорлыққа қарсы күрес күніне» орай елордасы Астана қаласында дәстүрлі  «Адал тұлға-2023» IX ұлттық сыйлығының жеңімпаздарын марапаттау рәсімі өтті.

«Әділдіктің бәйгесіне атыңды қос. Озсаң да–олжалысың, қалсаң да–олжалысың» дегенді ұран еткен тараздық жас мұғалім, жас журналист, педагогика ғылымдарының магистрі Ерсұлтан Кәрімжанұлы Нүсіпжанов «Адал тұлға-2023» ұлттық сыйлығының иегері атанып, «Қоғамдық құрмет»  номинациясымен және төсбелгісімен марапатталды. «Әділеттілік, парасаттылық және сенім» ұғымын кәсіби қызметінде басты бағыт еткен жас маман бүгінгі таңда өзі кәсіби педагогикалық іс-тәжірибеден өткен Тараз қаласы білім бөлімінің №3 мектеп-лицейінде қызмет етуде.

Жастар–қоғамның қозғаушы күші. Иә, ұлттық сыйлық иегері сыбайлас жемқорлық көріністерімен күресудің тиімді тәсілдеріне негізделген, қоғамда парасаттылық мәдениетін қалыптастыруға бағытталған іс-шараларға белсене атсалысып келеді. Мәселен, Қазақстан Республикасы Сыбайлас жемқорлыққа қарсы іс-қимыл агенттігінің Жамбыл облысы бойынша департаменті және «Жамбыл–адалдық алаңы» жобалық кеңсесінің бастамасымен ұйымдастырылған қоғамда сыбайлас жемқорлықты алдын алу және оған қарсы іс-қимыл туралы облыстық жобалар байқауында I дәрежелі дипломмен марапатталған. Ерсұлтан Кәрімжанұлы аталған жобаға қоғамның дерті болып табылатын сыбайлас жемқорлық көріністерімен күресудің тиімді тәсілдерінің шет елдегі тәжірибелеріне жасаған зерттеу жұмысын және жемқорлық фактілерінің алдын алуға бағытталған мобильді бағдарламаның жобасын ұсынған болатын.

Сонымен қатар, Қазақстан Республикасы Сыбайлас жемқорлыққа қарсы іс-қимыл агенттігінің Жамбыл облысы бойынша департаменті және «Жамбыл–адалдық алаңы» жобалық кеңсесі, Жамбыл облысы әкімдігінің жастар саясаты мәселелері басқармасы жастардың бойына адалдық пен сенімділікті, парасаттылықты және сыбайлас жемқорлыққа мүлдем төзбеушілікті қалыптастыру мақсатында ұйымдастырылған «Жас ақындар-жаршысы адалдықтың» атты облыстық мүшайрасына белсене атсалысқаны үшін Алғыс хатқа ие болған.

Академиялық адалдық мәдениетін қалыптастыру мақсатында өзі білім алған жоғары оқу орнының басшылығының бастамасымен қоғамдық орындарда «Ашықтық.Әділдік.Креативтілік.» идеясына негізделген жарнамалық орындарда қала орталығында орналасып, аталған идеяның шын мәнінде жүзеге асуына атсалысты және жоғары оқу орнында «Саналы ұрпақ» еріктілер клубының жетекшісі қызметін атқарды. Жауапкершілігі мол қоғамдық қызметте «Адалдық сағаттарының» және «Таза сессия» акцияларының белсенді жүргізілуін негізге алды. Ізденіс пен біліктілікті алға қойған үміткер осы уақытта ҚР Білім және ғылым министрлігі жанындағы Студенттік Кеңес мүшесі болғанын ерекше атап өткен жөн. Бұл кезеңде шәкіртақыны арттыру, оқыту сапасына қатысты мәселелер, студенттік жатақханалар салу және түлектерді сертификаттау, академиялық адалдық қағидаларын сақтау және сыбайлас жемқорлыққа деген төзбеушілікке байланысты мәселелерді талқылауға және оларды шешу жолдарын қарастыруға бағытталған жиындарға қатысып, осы бағыттағы жұмыстарға атсалысты.

Ұлттық сыйлық иегерінің пікірінше қоғамдық жұмыстардың бел ортасында жүруге алдыңғы буын ағалардың ақылы мен інілік ізеттіліктің үйлесімі әсер еткен. «Жамбыл облысы жастар мәслихаты» жастар қоғамдық бірлестігінің III шақырылым депутаттығына өтуі осының айғағы болса керек. Аталған қоғамдық бірлестікте де қоғамдық жұмыстардың бел ортасында жүруге ұмтылды, ізденді, тәжірибе жинады.

Сондай-ақ, ол Қазақстан Республикасы Конституциялық Кеңесі, «Zakon.kz», ҚР Тұңғыш Президенті-Елбасы қоры Конституцияның үстемдігін қамтамасыз ету және конституциялық патриотизм мәселелері бойынша ұйымдастырған эссе-конкурсқа белсенді түрде қатысқаны үшін ұйымдастыру комитетінің сертификатын иеленген. Мемлекеттік қызмет саласын ақпараттандыру бағытында атқарған жұмыстары үшін Қазақстан Республикасы Мемлекеттік қызмет істері агенттігінің Жамбыл облысы бойынша департаменті басшысының және қоғамдық жұмыстарға белсене атсалысқаны үшін қала әкімінің, басқарма басшыларының Алғыс хаттары табысталған.

Ол өзінің педагогикалық кәсіби іс-тәжірибеден өткен білім ордасының бүгінгі таңдағы жұмыс орнына айналуын,  облыстық телеарнадағы іс-тәжірибеден өтіп, оның ақпарат саласындағы жүргізушілік, дикторлық қызметтерін жауапкершілікпен алуын, қоғамдық жұмыстарда белсенді болуға деген ұмытылысын  «Адалдық.Әділдік.Патриотизм.» принциптерімен сабақтасып жататындығын өз шәкірттеріне айтып отырады.

«Ұстаз талантты болса, шәкірті талапты болар» деген халық даналығы бекер айтылмаса керек. Осы принциптерінің арғы жағында ұстаздарының, жоғары оқу орнындағы профессор оқытушылар құрамының ақыл-кеңесі, жөнін айтып, жол сілтеуі, бағыт-бағдар беруі және ерен еңбегі тұрғаны мәлім екенін айтады.

Ерсұлтан Кәрімжанұлы Нүсіпжанов ұйымдастырушылық, көшбасшылық қасиеттерін қалыптастырып, жастар саясатына айтарлықтай үлес қосып, өзінің Отанға деген сүйіспеншілігін, патриоттық сезімін, туған жеріне, еліне, ұлтына деген махаббатын іспен көрсете білетін жаңашыл жас.

Leave A Reply

Your email address will not be published.