Чикаго тауар биржасында (CME) алтынның ақпан айындағы фьючерстері 1,3 пайызға қымбаттап, бір унциясы 4900,6 долларды құрады. Бұл – бағалы металл үшін бұрын-соңды болмаған рекордтық көрсеткіш.

Reuters агенттігінің мәліметінше, алтын құнының күрт өсуіне бірнеше фактор әсер еткен. Атап айтқанда, әлемдегі геосаяси тұрақсыздықтың сақталуы, АҚШ долларының әлсіреуі және Федералдық қор жүйесінің алдағы уақытта негізгі пайыздық мөлшерлемені төмендетуі мүмкін деген болжамдар инвесторлардың алтынға деген қызығушылығын арттырған.

Сарапшылардың айтуынша, экономикалық белгісіздік жағдайында алтын «қауіпсіз актив» ретінде бағаланып, капиталды сақтаудың сенімді құралы болып қала береді. Осы үрдіс күміс пен платина нарығына да әсер еткен. Соңғы күндері бұл металдардың бағасы да рекордтық деңгейге жеткен.

Халықаралық қаржы ұйымдарының талдауына сәйкес, 2026 жылы алтын бағасы одан әрі өсуі мүмкін. Кейбір сарапшылар биылдың өзінде-ақ алтынның бір унциясы 5000 доллардан асады деп болжап отыр.

Айта кетейік, бағалы металдар нарығындағы мұндай өсім жаһандық экономикадағы тәуекелдердің артуымен, инфляциялық қысымның сақталуымен және орталық банктердің ақша-несие саясатына қатысты белгісіздікпен тікелей байланысты.