Депутат Комиссия жұмысының ашықтық қағидатына сүйеніп жүргізіліп жатқанын және барлық саяси күштердің пікірлері ескерілетінін айтты. Ол жоспарланып отырған өзгерістер институционалдық тұрғыдан қуатты Парламент қалыптастыруға бағытталғанын жеткізді.

«Біз тек қолданыстағы Конституцияға түзетулер енгізіп отырған жоқпыз. Біз Әділетті Қазақстанның сұранысына жауап беретін жаңа жүйені қалыптастырып жатырмыз. Бұл “Күшті Президент – ықпалды Парламент - есеп беретін Үкімет” қағидатына негізделген билік құрылымын жаңарту», - деді Елнұр Бейсенбаев.

Бір палаталы Парламент және партиялардың рөлі

Оның айтуынша, бір палаталы Парламентке көшу заң шығару процесін жылдамдатып қана қоймай, саяси партиялардың рөлін арттырады. Сонымен қатар депутаттардың қоғам алдындағы жауапкершілігі де күшеймек.

Бейсенбаевтың сөзінше, болашақта барлық заң жобалары бір органда үш оқылымнан өтеді. Алғашқы екі кезең ашық түрде өтсе, үшінші оқылым заңнамалық сәйкестікті тексеруге бағытталады. Бұл лоббистік ықпалдың алдын алуға мүмкіндік береді.

Пропорционалды жүйе және праймериз маңызы

Депутат пропорционалды сайлау жүйесінің және партияішілік праймериздің маңызды екенін атап өтті. Оның пікірінше, бұл тәсіл сайлаушы мен Парламент арасындағы байланысты нығайтып, азаматтардың өкілдік деңгейін арттырады.

«Партия әрбір дауыс үшін күреседі, оның ішінде тәуелсіз азаматтардың дауысы да бар. Бұл қоғам алдындағы жауапкершілікті күшейтеді», - деді ол.

Қосымша ұсыныстар

Отырыс барысында бірқатар қосымша түзетулер де көтерілді. Атап айтқанда:

некені ер мен әйелдің одағы ретінде Конституцияда бекіту;

преамбуланы «Әділетті Қазақстан» және «Заң мен Тәртіп» қағидаттары негізінде жаңарту;

зияткерлік меншікті қорғау тетіктерін күшейту.

Құрылтай атауының маңызы

Елнұр Бейсенбаев болашақ Парламенттің «Құрылтай» деп аталуын тарихи сабақтастық пен ұлттық жауапкершілікті білдіретін маңызды қадам ретінде бағалады.

«Бұл атау халық дәстүрімен, ұлттық рухпен және ел алдындағы жауапкершілікпен тығыз байланысты», - деп түйіндеді депутат.