Компания тарифтерді көтеру қажеттігін инвестициялық бағдарламаның өзгеруімен түсіндірген. Атап айтқанда, қарызды өтеу мен несие бойынша пайыз төлеуге кететін шығындардың артқаны айтылған. Заңнамаға сәйкес, инвестициялық бағдарлама немесе несие шарттары өзгерген жағдайда табиғи монополия субъектілері тарифті қайта қарауға өтініш бере алады.

Дегенмен Табиғи монополияларды реттеу комитеті 2026–2027 жылдары тарифтерді қазіргі деңгейде қалдыру туралы шешім қабылдаған. Ал 2028–2030 жылдары тарифтерді жыл сайын тек 4–5 пайыз көлемінде ғана өсіруге рұқсат берілген.

Ұлттық компанияның жаңа өтінішінде тарифтерді едәуір арттыру ұсынылған. Кейбір есептік коэффициенттер 80 пайызға дейін ұлғайтылған. Бұл өзгерістер әлеуметтік маңызы бар азық-түлік тауарларынан басқа барлық жүк түрлеріне қатысты болуы тиіс еді.

Алайда өтінішті қарау барысында реттеуші орган компания тарапынан барлық қажетті дәлелдейтін құжаттар толық ұсынылмағанын анықтаған. Осыған байланысты тарифтерді көтеру туралы өтініш қанағаттандырылмады.

Осылайша, жақын екі жылда теміржол тарифтері бұрынғы деңгейде сақталады. Ал кейінгі кезеңде өсім тек реттеуші бекіткен шектеулі мөлшерде жүзеге асуы мүмкін.