Егер бұл өзгеріс қабылданса, салымшылар бұрынғыдай пәтер құнының 50 пайызын жинақтап, қаражатты енгізгеннен кейін бірден баспана сатып алу процесін бастай алады.

Банк басшысы Ләззат Ибрагимованың айтуынша, бұл мәселе бойынша қаржы ұйымына азаматтардан көп өтініш түсіп жатыр. Алайда тұрғын үй жинақ жүйесінің өз қағидалары бар. Яғни, жүйе бойынша адам алдымен белгілі бір уақыт бойы қаражат жинап, содан кейін ғана жеңілдетілген несие алу мүмкіндігіне ие болады.

Қазіргі талап бойынша, егер салымшы алғаш рет депозит ашып, бірден ірі көлемде ақша салса, ол қаражат кемінде алты ай банк шотында сақталуы тиіс. Бұл ереже жүйенің әділдігін сақтау үшін енгізілген.

Сонымен қатар, ұзақ уақыт бойы тұрақты түрде ақша жинап жүрген салымшылар үшін бұл мерзім қысқарады. Мұндай жағдайда күту уақыты бағалау көрсеткішіне байланысты шамамен 3–4 ай болуы мүмкін.

Банк өкілдері қазір жүйені жетілдіру бағытында түрлі ұсыныстарды зерттеп жатқанын айтады. Соның ішінде пайыздық мөлшерлемелерді өзгерту мәселесі де қарастырылуда.

Мысалы, кейбір салымшылар бағалау көрсеткіші жоғары болған кезде несие бойынша пайыз төмен болуы керек деп санайды. Қазіргі таңда банк бұл ұсыныстарға сараптама жасап, тиімді шешім қабылдау мүмкіндігін қарастырып жатыр.

Мамандардың айтуынша, болашақта ұзақ уақыт бойы тұрақты түрде ақша жинап, жоғары бағалау көрсеткішіне жеткен азаматтар ең тиімді несие шарттарына ие болуы тиіс.