29 наурыз, 2026
28 наурыз күні Ереван қаласында өткен MELBET HYPE ASIA турнирі жанкүйерлер үшін нағыз эмоцияға толы кеш болды. Бұл кештің басты жекпе-жектерінің бірі — қазақстандық танымал файтер Еркебұлан Тоқтар мен қырғызстандық спортшы Марсель арасындағы кездесу еді, деп хабарлайды baq-orda.kz.
Еркебұлан бұл жолы да өз стиліне сай ерекше шығумен елді таңғалдырды. Ол аренаның ең биік тұсына көтеріліп, сөзбе-сөз «аспаннан түскендей» эффект жасап, көрерменнің назарын бірден өзіне аударды. Залда отырған жанкүйерлердің реакциясы да соған сай — гуіл, қолдау, эмоция.
Алайда, бұл жолы шоу жеңіске жеткізбеді. Қырғыз файтері Марсель салқынқанды тактика көрсетіп, жекпе-жекті бақылауда ұстай алды. Нәтижесінде, Еркебұлан Тоқтар бұл кездесуде жеңіліс тапты.
Соған қарамастан, қазақстандық спортшының басты ерекшелігі өзгермеді — ол тағы да көрерменге эмоция сыйлады.
Әлеуметтік желілерде ешқандай сын болған жоқ деуге болады. Керісінше, көпшілік бірауыздан қолдау білдіріп, “біз үшін чемпион — Еркебұлан” деген пікірлер жазды. Оның батылдығы, харизмасы және ел намысын қорғап шыққаны жанкүйерлер үшін жеңістен кем болмады.
Қалай десек те, Еркебұлан Тоқтар үшін бұл жекпе-жек — жеңіліс қана емес, тәжірибе. Ал оның рингтегі шоуы әлі де талқылана беретіні анық.
