Бүгін, 14:34
Еліміздің тұрақты дамуы мен жарқын болашағы қоғамдық келісімге, өзара сенімге және азаматтардың жауапкершілігіне тікелей байланысты. Осы тұрғыдан алғанда, 23 тамызда өтетін Құрылтай сайлауы – ел өміріндегі маңызды қоғамдық-саяси оқиғалардың бірі. Бұл – қоғамның пікірін білдіруге, елдік мәселелерге бейжай қарамайтын азаматтардың таңдау жасауына мүмкіндік беретін маңызды кезең.
Құрылтай – халықтың ой-пікірі мен ұсынысын тоғыстыратын, ел дамуына қатысты өзекті мәселелерді кеңінен талқылайтын қоғамдық институт. Оның құрамына лайықты азаматтардың сайлануы қоғамдағы өзара сенімді нығайтып, сындарлы диалогтың қалыптасуына жол ашады. Мұндай үдерістер елдің бірлігі мен қоғамдық тұрақтылығын одан әрі бекемдей түседі.
Халықтың ынтымағы мен татулығы – кез келген мемлекеттің ең үлкен байлығы. Бүгінде елімізде жүзеге асырылып жатқан игі бастамалардың нәтижелі болуы да осы ауызбіршілік пен ортақ жауапкершіліктің арқасы. Қоғамдағы әрбір оң өзгеріс азаматтардың белсенді ұстанымы мен ел болашағына деген жанашыр көзқарасынан бастау алады.
Құрылтай сайлауы – елдік мүддені жоғары қоятын, халық сеніміне ие азаматтарды анықтайтын маңызды кезең. Сондықтан бұл науқанның мәні тек дауыс берумен шектелмейді. Ол – қоғамның болашақ даму бағытына деген ортақ көзқарастың, жауапкершілік пен сенімнің көрінісі.
Бірлігі бекем, берекесі мол қоғам ғана ұзақ мерзімді жетістіктерге жете алады. Елдің өсіп-өркендеуі, қоғамдық келісімнің сақталуы және жасампаз бастамалардың жалғасуы – баршамыз үшін ортақ құндылық. Осындай құндылықтарды нығайту жолындағы әрбір қадам мемлекетіміздің баянды болашағына қызмет етері сөзсіз.
Төле Аманжолұлы Сүгірбай, Жамбыл облысының және Қордай ауданының Құрметті азаматы
