30 наурыз, 2026
Қазақстандық файтер әрі актер Еркебұлан Тоқтар Арменияның Ереван қаласында өткен Hype FC 28 турнирінде қырғызстандық қарсыласына есе жібергеннен кейін, оның анасы әлеуметтік желіде жүрекжарды жазба жариялады, деп хабарлайды baq-orda.kz.
Анасы ұлының бала кезінен қандай болғанын еске алып, оның отбасы үшін ерекше орын алатынын атап өтті. Оның айтуынша, Еркебұлан – көптен күткен перзент, сабырлы мінезімен және еңбекқорлығымен ерте жастан ерекшеленген.
- «Ол біздің шетінеп кеткен баламыздан кейін дүниеге келген өте қадірлі ұлымыз. Кішкентайынан сабырлы, көп мазаламайтын. Өзінен кейінгі бауырларына қамқор болып өсті. Бес жасында-ақ маған көмектесіп, ауыр жүкті көтеріп жүретін», — деп еске алды анасы.
Сондай-ақ ол ұлына деген ақ тілегін білдіріп, қандай жағдай болса да оны мақтан тұтатынын жеткізді.
- «Жаным балам, сен біз үшін ең қымбатты, ең мықты ұлсың. Саған әрдайым ризамыз. Алла саған денсаулық, амандық, екі дүниенің бақытын нәсіп етсін», — деп жазды ол.
Желі қолданушылары да бұл жазбаны жылы қабылдап, ана махаббатына тәнті болғандарын білдірді. Көпшілік Еркебұлан Тоқтарға қолдау білдіріп, алдағы жекпе-жектерде сәттілік тіледі.
