Бүгін, 15:08
Жамбыл облысында шегірткеге қарсы күрес аясында 230 мың гектардан астам алқапты өңдеу жоспарланып отыр. Фитосанитарлық жұмыстар сәуір айының ортасында, алғашқы зиянкестер пайда болысымен басталады. Оған дейін мамандар жерді тексеріп, шегірткенің жұмыртқа салған орындарын анықтаумен айналысады, деп хабарлайды baq-orda.kz.
Көктемнің басында фитосанитарлық қызмет мамандары егіс алқаптарын арнайы әдіспен зерттейді. Олар топырақтағы жарықтар мен ұсақ тесіктерге назар аударып, шегірткенің жұмыртқа салған орындарын анықтайды. Жәндіктердің дернәсілдері әдетте 5–10 сантиметр тереңдікте орналасады.
Зерттеу барысында белгілі бір аумақтан алынған сынамалар арқылы жұмыртқалардың жағдайы тексеріледі. Мысалы, бір сынамада әр текше метрге шаққанда ондаған дернәсіл анықталуы мүмкін. Орта есеппен әр ұядан 25 дернәсіл шықса, бір гектарда шамамен 4 миллионға дейін жәндік пайда болуы ықтимал.
Мамандардың айтуынша, жұмыртқаларды бүлдірмей санау үшін топырақты аса мұқият қазу қажет. Табылған үлгілердің бір бөлігі зертханаға жіберіліп, дернәсілдердің шығу мерзімі анықталады.
Ақпаратқа сәйкес, биыл Жамбыл облысында мароккалық, италиялық және азиялық шегірткенің таралу аумағы 230 мың гектарға жетеді. Бұл өткен жылмен салыстырғанда екі есе көп. Зиянкестер санының артуы табиғи циклдік құбылыс ретінде бағаланады.
Мамандардың болжамынша, биыл дернәсілдердің тығыздығы бір шаршы метрге 500–600 данаға дейін жетуі мүмкін. Кейін жәндіктер қанаттанып, ұшу кезеңіне өтеді. Осы уақытта залалданған аумақтар нақты анықталып, химиялық өңдеуге жіберіледі.
Жалпы, өңірде шегірткеге қарсы күрес жұмыстары сәуір айында басталады. Бұл мақсатта 56 бірлік арнайы техника жұмылдырылады.
