Бүгін, 12:53
Мемлекет басшысы Қасым-Жомарт Тоқаев өз Жолдауларында бұқаралық спортты дамыту, жастарды салауатты өмір салтына баулу – ел болашағының берік негізі екенін үнемі атап келеді.
Президенттің айтуынша, спорт – тек денсаулық кепілі ғана емес, ол – тәртіп пен табандылықтың, ұлттық рухтың көрінісі.
Осындай қағиданы берік ұстанған жастардың бірі – қазақ күресінен спорт шеберлігіне үміткер, Қазақстан чемпионатының жеңімпазы әрі жүлдегері, Жамбыл облысының бірнеше дүркін чемпионы, халықаралық турнирлердің жүлдегері Ақеділ Көкрекбай.
Спорттағы жол – отбасынан басталған тәрбие
Ақеділдің айтуынша, оның спорттағы алғашқы қадамы отбасымен тығыз байланысты. Әсіресе, әкесінің рөлі ерекше.
«Әкем мен үшін тек ата-ана ғана емес, алғашқы ұстазым әрі бапкерім болды. Ол кісі бала кезімнен тәртіп пен еңбекқорлыққа баулыды. Күреске деген қызығушылығым да сол кісінің арқасында оянды», – дейді жас палуан.
Ол Жамбыл облысы, Мойынқұм ауданында дүниеге келіп, мектепті үздік аяқтаған. Қазіргі таңда Қазақ ұлттық су шаруашылығы және ирригация университеті студенті. Таңдаған мамандығы – елді мекендерді сумен қамтамасыз ету және су бұру жүйелері.
Әр белдесу – бір мектеп
Спорттағы жетістік оңайлықпен келмейтіні белгілі. Ақеділ үшін әр жарыс – тәжірибе мен шыңдалу алаңы.
«Әсіресе, алғашқы жарыстар мен финалдық белдесулер ерекше есте қалады. Сол сәттерде тек дайындық емес, мінез бен төзімділік сынға түседі», – дейді ол.
2024 жылы Талдықорғанда өткен Қазақстан чемпионаты спортшының есінде ерекше қалған. Ақтық сынға шығу жолындағы тартысты белдесу оның ерік-жігерін шыңдаған.
Жеңістің артында – тәртіп пен құрбандық
Жас спортшы жеңістің құпиясын тек жаттығумен байланыстырмайды.
«Жеңіс – бұл тәртіптің, сабырдың және шыдамдылықтың нәтижесі. Кейде достармен уақыт өткізуден, демалыстан бас тартуға тура келеді. Бірақ үлкен мақсат үшін мұндай қадамдар қажет», – дейді Ақеділ.
Оның айтуынша, спортшы үшін ең бастысы – өзін-өзі жеңу, ішкі әлсіздікпен күресу.
Қазақ күресі – ұлттық рух айнасы
Ақеділ үшін қазақ күресі – жай ғана спорт емес, бұл ұлттық болмыс пен рухтың көрінісі.
«Әр белдесуге шыққанда тек өзің үшін емес, ел намысы үшін күресіп тұрғандай сезінесің. Сондықтан бұл спортты дамыту – біз үшін үлкен міндет», – дейді ол.
Спорт пен білім – қатар өрілген жол
Жас палуан спортпен қатар білімге де ерекше мән береді. Ол болашағын тек спортпен ғана байланыстырмай, тұрақты мамандық иесі болуды мақсат еткен.
«Спорт – өмірімнің бір бөлігі. Бірақ ертеңгі күні өз мамандығым бойынша еңбек еткім келеді. Бұл – менің болашағыма жасаған инвестициям», – дейді студент.
Университет ұстаздарының қолдауы да оның жетістіктеріне оң әсерін тигізіп отыр. Ал уақытты тиімді пайдалану – оның басты қағидасы.
Алғыс пен мақсат
Ақеділ өз жетістігінің артында ата-анасы мен бапкерлерінің еңбегі жатқанын ерекше атап өтеді.
«Ең алдымен ата-анама, әсіресе әкеме алғыс айтамын. Сонымен қатар бапкерлеріме ризамын. Олардың сенімі – менің әр жеңісімнің негізі», – дейді ол.
Ал алдағы жоспары – биік.
«Азия және әлем чемпионаттарында ел намысын қорғап, жоғары нәтижеге жеткім келеді», – дейді жас спортшы.
