Есепті кезеңде 70 шара ұйымдастырылып, 3150 адам қамтылды. Бұл шаралар шекара бөлімшелерінің сарбаздары, Жасөспірімдер үйі тәрбиеленушілері және колледж студенттерімен кездесулерді қамтиды.

Мысалы, Тараз қаласында медицина және құқық қорғау органдарының мамандары тартылған кездесулер ұйымдастырылды. Жастармен ашық диалог орнату арқылы салауатты өмір салтын насихаттау, қоғамдық қауіпсіздікті сақтау және әлеуметтік жауапкершілікті арттыру көзделді. Сондай-ақ, "Қауіпсіздік сағаты" жобасы аясында колледж студенттері мен аналар психологтардың қатысуымен кездесулер циклін өткізді.

Қордай және Меркі аудандарында "Бала тәрбиесі – ортақ мәселе" және "Тәрбиелі бала – ата-ана мерейі" тақырыбындағы шаралар ата-аналар мен жастардың басын қосты. Бұл жоба жастардың санасын оятуға және оларды қоғамдық өмірге белсене араласуға ынталандырады. Аналар кеңесінің бұл бастамасы – болашақ ұрпақтың рухани саулығына қосылған үлкен үлес.