2025 жылдың бірінші жартыжылдығында "Ассамблея жастары" 65 шара ұйымдастырып, 13 500 жасты қамтыса, Ақсақалдар кеңесі 381 шара арқылы 11 510 адамға әсер етті.

"Ассамблея жастары" ұйымының 95 мүшесі бар, ал Қордай ауданында жаңа өкілдік ашылды. "Жаңа толқын" жобасы аясында 16 шара өтіп, 5100 адам қатысты. Мысалы, "ProMediа 2.0" шарасында жастар медиа сауаттылық пен сөз сөйлеу мәдениетін меңгерді. Сондай-ақ, "Бірлік жүгірісі" марафонына 700-ден астам адам қатысып, этносаралық татулықты паш етті.

Ақсақалдар кеңесі 245 мүшеден тұрады және "Адал азамат" жобасы аясында жастарды еңбекке, әділдікке тәрбиелеуге бағытталған 14 шара өткізді. 21 қаңтарда Тараздағы Достық үйінде жастар мен ақсақалдар "Өскелең ұрпаққа өнегелі тәрбие" жобасы аясында бас қосты. "Тарих ғибраты" жобасы бойынша 15 шарада 2000-ға жуық жас тарихи құндылықтармен танысты.

Мемлекеттік тілді ілгерілету де назардан тыс қалған жоқ. "Мәміле" пікірталас клубының 3 отырысы және қазақ тілі курстары этнос өкілдерінің тілге деген қызығушылығын арттырды. Ассамблея жастары мен ақсақалдардың бірлескен жұмысы – бірлік пен руханияттың жарқын көрінісі.