«Ақылды қалалар» құру әдістемесіне сәйкес, 2024 жылғы 13 қыркүйекте облыс әкімінің өкімімен арнайы жол картасы бекітілді. Аталған құжат аясында 22 негізгі және 5 қосымша жоба қарастырылған. Қазіргі таңда негізгі жобалардың басым бөлігі орындалды немесе іске асырылу үстінде. Сонымен қатар, 2025 жылы «Ақылды қалаларды» дамыту бойынша арнайы жұмыс тобы құрылып, оның ұсыныстары негізінде 2026–2030 жылдарға арналған өңірлік стратегия мен жол картасы бекітілді. Бұл құжатта Тараз қаласы мен аудандарды қамтитын бірқатар нақты бастамалар көзделген

Өңірдің цифрлық экожүйесін дамыту мақсатында білім беру, мемлекеттік сектор және инновациялық орта арасында тиімді әріптестік орнатылған. Соның айқын көрінісі - 2023 жылы құрылған «ZhambylHub» өңірлік IT-хабы. Бүгінде бұл алаң стартаптарды қолдауға, жастарды IT саласына тартуға және инновациялық жобаларды дамытуға бағытталған маңызды орталыққа айналды. Хаб базасында жүздеген іс-шара өткізіліп, мыңдаған қатысушы қамтылды

Алдағы жылдарға арналған цифрлық даму стратегиясында жасанды интеллектіні енгізу, денсаулық сақтау мен білім беру салаларын цифрландыру, телемедицина, бірыңғай аналитикалық платформалар, 5G байланысын кеңейту, киберқауіпсіздікті күшейту және ауылдық елді мекендерді жоғары жылдамдықты интернетпен қамту сияқты маңызды бағыттар қамтылған. Бұл бастамалар өңір тұрғындарының өмір сапасын арттыруға және Жамбыл облысының бәсекеге қабілеттілігін күшейтуге бағытталған

Жалпы алғанда, Жамбыл облысында жүзеге асырылып жатқан «Ақылды қала» жобалары цифрландыруды тек технологиялық жаңғыру ретінде емес, өңірдің тұрақты дамуына қызмет ететін стратегиялық құрал ретінде қарастыруға мүмкіндік береді.