ҚР Конституциялық Сотының төрайымы Эльвира Азимованың айтуынша, комиссияға екі мыңнан астам ұсыныс түсіп, олардың барлығы арнайы жинақталған кестеге біріктірілген.

«Азаматтар мен сарапшылардың белсенді қатысуы реформаның жоғары қоғамдық маңызын көрсетеді. Конституциялық өзгерістер халықтың тікелей қатысуымен жүзеге асуы тиіс», - деді ол.

Үкімет пен сот жүйесіне қатысты өзгерістер

Отырыс барысында Әділет министрі Ерлан Сәрсембаев түзетулер Үкіметтің қызметі, Конституциялық сот, прокуратура органдары, сот билігі және жергілікті өзін-өзі басқару мәселелерін қамтитынын атап өтті.

Сонымен қатар мемлекеттік бағдарламаларды бекіту және мемлекеттік комитеттерге қатысты кейбір өкілеттіктерді Үкімет құзыретінен алып тастау ұсынылып отыр.

Министрдің айтуынша, Конституцияда әкімшілік сот ісін жүргізу арқылы сот билігінің жүзеге асатыны нақты көрсетілуі мүмкін. Бұл мемлекет пен азамат арасындағы құқықтық тепе-теңдікті күшейтеді.

Бір палаталы Парламент - Құрылтай туралы ұсыныс

Сенат депутаты Нұрлан Бекназаров бір палаталы Парламентке көшуге байланысты Конституцияға елеулі өзгерістер енгізу жоспарланып отырғанын мәлімдеді.

Ұсынысқа сәйкес, болашақ Құрылтай 145 депутаттан тұрады және депутаттар бес жыл мерзімге пропорционалды сайлау жүйесі арқылы сайланады.

Халық кеңесінің мәртебесі күшейеді

Бекназаров Конституцияға Халық кеңесінің өкілеттіктері туралы жеке бөлім енгізу оның маңызын арттыратынын айтты.

«Халық кеңесі - қоғам мүддесін білдіретін жоғары консультативтік орган болады. Оның құрылымы мен қызметі Конституциялық заңмен айқындалады», - деді депутат.

Құқық қорғау тетіктері нығаяды

Мәжіліс депутаты Снежанна Имашева комиссия мүшелеріне түзетулердің салыстырмалы кестесін таныстырып, ұсыныстар адам құқықтарын қорғау мен құқықтық айқындықты күшейтуге бағытталғанын жеткізді.

Атап айтқанда, адам қадір-қасиеті, өмір сүру құқығы, жеке бостандық, дербес деректерді қорғау және зайырлы мемлекет қағидаттарына ерекше көңіл бөлінген.

Комиссия жұмысы жалғасады

Комиссия мүшелері енді ұсынылған өзгерістерді жұмыс секцияларында талқылауға кірісті. Келесі отырыс бүгін сағат 17:00-де өтеді.