2026 жылғы 26 ақпан күні кешкі уақытта Ақмола облысының Щучинск қаласында тұрғын үйге жапсарлас орналасқан «Палау орталығы» дәмханасында газ жарылысы болып, арты өртке ұласқан. Оқиға мекеме жұмыс істеп тұрған сәтте болған. Алдын ала мәлімет бойынша, жарылыс газ қондырғыларымен байланысты болуы мүмкін. Оқиға орнына жедел түрде төтенше жағдайлар қызметі мен медицина бригадалары жетті.
Соңғы ресми дерекке сәйкес, жарылыс салдарынан жеті адам қаза тапты, олардың арасында 16 жастағы жасөспірім қыз бар. Сонымен қатар 26 адам түрлі деңгейдегі жарақат алып, күйік және басқа да дене жарақаттарымен медициналық көмекке жүгінген.
Зардап шеккендердің 15-і ауруханаға жатқызылды. Қазіргі уақытта олардың 13-і стационарда ем қабылдауда. Алты адамға алғашқы медициналық көмек көрсетіліп, амбулаториялық бақылауға жіберілген. Дәрігерлер ауыр күйік алған науқастардың жағдайын ерекше бақылауда ұстап отыр.
Өрт сөндірушілер ғимарат ішінен сегіз газ баллонын шығарып, оннан астам адамды құтқарған. Өрт толық сөндіріліп, қазіргі уақытта оқиға орнында үйінділерді аршу және сараптама жұмыстары жүргізілуде.
Облыстық әкімдік жанынан жедел штаб құрылып, жарылыстың нақты себептерін анықтау бойынша тергеу амалдары басталды. Жергілікті билік қаза тапқандардың отбасылары мен зардап шеккен азаматтарға қажетті көмек көрсетілетінін мәлімдеді.
Ұқсас жаңалықтар
