Иран президенті Масуд Пезешкиан көрші мемлекеттердің басшыларына үндеу жасап, елінің қазіргі әскери жағдайға байланысты әрекеттерін түсіндірді. Ол бұл мәлімдемені әлеуметтік желідегі X парақшасында жариялап, Иран соғысты болдырмау үшін дипломатиялық жолдарды пайдалануға тырысқанын, алайда АҚШ пен Израиль тарапынан жасалған әскери шабуылдан кейін өзін қорғаудан басқа амал қалмағанын айтты.
Президенттің сөзінше, Иран аймақтағы көрші мемлекеттердің тәуелсіздігі мен аумақтық тұтастығын құрметтейді. Сонымен қатар ол Таяу Шығыстағы тұрақтылықты қамтамасыз ету алдымен осы аймақта орналасқан елдердің ортақ жауапкершілігі екенін атап өтті.
Бұған дейін 28 ақпанда АҚШ пен Израиль Иранға қарсы ірі әскери операция бастағаны хабарланған. Израиль билігі бұл қадамды Тегеранның ядролық қару жасау мүмкіндігін шектеу мақсатымен түсіндірсе, АҚШ тарапы Иранның әскери инфрақұрылымына соққы жасалатынын мәлімдеген.
Иранның Қызыл Жарты Ай ұйымының мәліметіне сәйкес, аталған шабуылдар салдарынан кемінде мыңға жуық адам қаза тапқан. Қаза болғандардың арасында елдің жоғарғы көшбасшысы Әли Хаменеидің де бар екені айтылды.
Бірқатар халықаралық ақпарат құралдары зымыран соққылары тек әскери нысандарға ғана емес, азаматтық инфрақұрылымға да тигенін хабарлады. Осы жағдайға жауап ретінде Иран Израиль аумағына және Таяу Шығыста орналасқан америкалық әскери базаларға соққы жасаған.
Ал АҚШ президенті Дональд Трамп әскери операция бастапқыда жоспарланған мерзімнен ұзаққа созылуы мүмкін екенін мәлімдеді. Сонымен қатар АҚШ мемлекеттік хатшысы Марко Рубио Иранға қарсы шабуылдар әрі қарай да жалғасуы ықтимал екенін айтты.
Ұқсас жаңалықтар
