Компанияның мәліметінше, жаңа аккаунттарда функциялар шектеулі болады. Мұндай профиль арқылы балалар тек хабарлама алмасып, аудио немесе бейне қоңырау шала алады. Ал кейбір күрделі немесе қауіпті болуы мүмкін мүмкіндіктер толық немесе ішінара шектеледі.

Ең басты ерекшеліктердің бірі – ата-аналық бақылау жүйесі. Баланың аккаунтын ата-анасы немесе қамқоршысы міндетті түрде бақылап отырады. Олар:

баламен кім хабарласа алатынын;

қандай топтарға қосыла алатынын;

белгісіз нөмірлерден келген хабарламаларды;

құпиялылық параметрлерін

толықтай өздері басқара алады.

Мұндай өзгерістер соңғы жылдары балалардың әлеуметтік желілерді пайдалануына қатысты алаңдаушылықтың күшеюіне байланысты енгізілмек. Көптеген елдерде балалардың интернеттегі қауіпсіздігі, психологиялық жағдайы және киберқауіпсіздік мәселелері жиі көтеріліп келеді.

Мысалы, Australia балалар мен жасөспірімдердің әлеуметтік желілерді пайдалануына шектеу енгізу мәселесін алғаш көтерген мемлекеттердің бірі саналады. Бұл шаралар жастардың психикалық денсаулығын қорғау және интернеттегі қауіп-қатерді азайту мақсатында қарастырылған.

Сарапшылардың айтуынша, мессенджерлерде алаяқтық жағдайлары да кездеседі. Кейбір қаскөйлер қолданушыларды алдап, қауіпсіздік кодтарын немесе PIN-кодтарын сұрап, олардың жеке аккаунттарына немесе топтық чаттарына қол жеткізіп жатады.

Осыған байланысты WhatsApp балаларға арналған жаңа аккаунттарда қауіпсіздік жүйесін күшейтіп, ата-аналарға кеңейтілген бақылау құралдарын ұсынуды жоспарлап отыр.

Егер бұл жүйе іске қосылса, балалардың мессенджерді пайдалану тәжірибесі қауіпсіз әрі бақылаулы форматта жүзеге аспақ.