«Тағы бір мәселе – толық цифрлық мемлекет құру. Бұл мақсаттың еліміз үшін маңыздылығын жақсы білесіздер. Мәслихаттар бұл үдерістен тыс қалмауға тиіс», – деді Мемлекет басшысы.

Қасым-Жомарт Тоқаевтың пікірінше, заманауи технологиялар мен жасанды интеллектіні мемлекеттік басқару жүйесіне кеңінен енгізу елдің тұрақты дамуына тікелей ықпал етеді.

«Озық технологиялар мен жасанды интеллектіні мемлекеттік басқару жүйесінің барлық саласына енгізу стратегиялық маңызы бар мақсатқа айналды. Еліміздің жарқын болашағы осы мақсаттың табысты іске асуына тікелей байланысты», – деді Президент.

Мемлекет басшысы бұл бағыттағы жұмыстарға мәслихат депутаттарының да белсенді қатысуы қажет екенін атап өтті.

«Бұл тұрғыдан алғанда, мәслихаттардың осы жұмысқа белсенді атсалысқаны абзал», – деді Қасым-Жомарт Тоқаев.

Сонымен қатар Президент депутаттардың кәсіби деңгейін арттыру мен цифрлық құзыреттерін дамыту маңызды екенін ерекше атап өтті.

«Сондай-ақ депутаттардың кәсіби білігін арттырып, цифрлық құзыретін кеңейту өте маңызды, онсыз істелген жұмыстың бәрі бос болмақ», – деді Мемлекет басшысы.

Бұл бағыттағы жұмыстарды жүйелі түрде жүргізуде Мемлекеттік басқару академиясының рөлі зор екені де айтылды.

«Бұл шаруамен Мемлекеттік басқару академиясы белсенді және тиімді түрде айналысуға тиіс. Менің білуімше, таяу арада нәтижелер де белгілі болмақ», – деді Президент.

Қазіргі таңда депутаттардың біліктілігін арттыру бағытында нақты жұмыстар қолға алынған. Бүгінге дейін шамамен 1200 депутат арнайы оқу курстарынан өтіп, кәсіби білімін жетілдірген.

«Бүгінге дейін 1200-ге жуық депутат арнайы оқу курсына шақырылып, кәсіби тұрғыдан шыңдалды», – деді Қасым-Жомарт Тоқаев.

Президенттің айтуынша, енді жаңа кезеңде жасанды интеллектіні басқару мәселесіне ерекше назар аударылмақ.

«Енді биыл басталған AI Governance 500 бағдарламасының аясында облыстық мәслихаттардың аппарат басшыларын оқыту қажет», – деді Мемлекет басшысы.

Сөз соңында Президент еліміздегі цифрлық өзгерістер өңірлер мен орталық арасындағы айырмашылықты азайтуға бағытталуы тиіс екенін атап өтті.

«Жалпы, елімізде жасалып жатқан цифрлық өзгерістер орталық пен аймақтар арасындағы алшақтықты мейлінше азайтуы қажет», – деді Қасым-Жомарт Тоқаев.

Осылайша, цифрлық мемлекет құру жолындағы бастамалар мемлекеттік басқарудың тиімділігін арттырып қана қоймай, өңірлердің дамуына жаңа мүмкіндіктер ашатыны анық.