Мемлекет басшысы мәслихаттардың болашақта жоғары заң шығарушы орган үшін кәсіби кадрлар даярлауда маңызды рөл атқаратынын атап өтті.

«Мәслихаттар жоғары заң шығарушы органға қажетті кадрларды даярлауға белсене атсалысуы керек», – деді Қасым-Жомарт Тоқаев.

Президенттің айтуынша, референдумға ұсынылған Конституция жобасында жаңа бір палаталы Құрылтай депутаттарын сайлау пропорционалды өкілдік жүйесі негізінде жүзеге асатыны көрсетілген.

«Референдумға шығарылған Конституция жобасында жаңа бір палаталы Құрылтайдың депутаттары пропорциялы өкілдік жүйе негізінде сайланады деп көрсетілген. Бұл қадам саяси партиялардың рөлін күшейтіп, заң шығару жұмысының сапасын арттыратыны күмәнсіз», – деді Мемлекет басшысы.

Қасым-Жомарт Тоқаев бұл жүйе халықаралық тәжірибеге толық сәйкес келетінін де атап өтті.

«Мұндай ұстаным озық халықаралық тәжірибеге толық сай келеді. Біз көптеген мемлекеттердің пропорциялы сайлау жүйесіне көшіп жатқанын көріп отырмыз. Дамыған елдерде де осындай жүйе бар. Себебі бұл тәсіл өз тиімділігін көрсетті», – деді Президент.

Сонымен қатар Мемлекет басшысы өңірлерде мажоритарлық, яғни бір мандатты сайлау жүйесі сақталатынын айтты.

«Аймақтарда мажоритарлық, яғни бір мандатты жүйе сақталады. Бұл – өте маңызды», – деді Қасым-Жомарт Тоқаев.

Президенттің айтуынша, дәл осы жүйе мәслихат депутаттарының халықпен тікелей байланысын сақтауға мүмкіндік береді.

«Себебі дәл осы мәслихат депутаттары жергілікті жерде сайлаушылармен үнемі байланыста болып, қоян-қолтық жұмыс істейді», – деді Мемлекет басшысы.

Сонымен қатар мұндай жүйе партия құрамына кірмейтін, бірақ халық сеніміне ие азаматтарға да саясатқа араласуға мүмкіндік береді.

«Сонымен бірге мұндай жүйе ешқандай партияға кірмейтін, бірақ халық сенетін іскер азаматтар үшін тағы бір тиімді саяси баспалдақ болмақ. Сол арқылы мәслихаттардың рөлі арта түседі», – деді Президент.

Мемлекет басшысы референдум нәтижесінде еліміздің саяси құрылымы айтарлықтай өзгеруі мүмкін екенін атап өтті.

«Азаматтар референдумда Конституция жобасын қолдап жатса, еліміздің саяси құрылымы түбегейлі өзгереді. Біз мүлдем жаңа конституциялық үлгіге немесе модельге көшеміз», – деді Қасым-Жомарт Тоқаев.

Президенттің айтуынша, жаңа жүйе пропорционалды және мажоритарлық сайлау үлгілерінің арасындағы теңгерімді қамтамасыз етеді.

«Бұл қадам пропорционалдық және мажоритарлық жүйе арасындағы тепе-теңдікті қамтамасыз етеді», – деді Мемлекет басшысы.

Сонымен бірге бұл өзгерістер сайлау процесін жүйелеп, кандидаттардың жауапкершілігін арттыруға ықпал етеді.

«Бұған қоса, сайлау үдерісін барынша жүйелеп, сайлауға түсетін азаматтардың жауапкершілігін арттыра түседі», – деді Қасым-Жомарт Тоқаев.

Президенттің пікірінше, осы өзгерістер арқылы мәслихаттар жоғары заң шығарушы орган үшін кәсіби әрі білікті кадрларды қалыптастыруға ықпал етеді.

«Осылайша, мәслихаттар Құрылтайға қажетті білікті мамандар даярлауға белсенді түрде атсалысады», – деді Мемлекет басшысы.

Қасым-Жомарт Тоқаев елде жүргізіліп жатқан ауқымды реформаларды табысты жүзеге асыру үшін сапалы заң шығару қызметінің маңызы зор екенін атап өтті.

«Ауқымды реформаларды сапалы жүзеге асыру үшін мейлінше тиімді әрі кәсіби заң шығару қызметін жолға қоюымыз керек», – деді Президент.

Мемлекет басшысы өкілді билік жүйесінің негізі өңірлерде қалыптасатынын да ерекше атап өтті.

«Ал еліміздегі өкілді билік жүйесінің негізі аймақтарда қалыптасады. Сондықтан мәслихаттардың қызметі айрықша маңызды екенін үнемі есте ұстаған жөн», – деді Қасым-Жомарт Тоқаев.

Президенттің айтуынша, азаматтар ең алдымен өз мәселесін жергілікті депутаттарға жеткізеді.

«Себебі жұрт өз мәселесін ең алдымен депутаттарға айтады. Ал халықтың сенімін ақтаудан артық абырой жоқ», – деді Мемлекет басшысы.

Сонымен қатар Президент депутаттың мәртебесі мен жауапкершілігі туралы да айтты.

«Түптеп келгенде, депутат болу – ел адамы болу деген сөз. Бұл – мәртебесі биік, жауапкершілігі зор қызмет», – деді Қасым-Жомарт Тоқаев.

Президенттің пікірінше, ел мүддесін бәрінен жоғары қоятын азаматтар ғана нағыз депутат атана алады.

«Ұлт мүддесін бәрінен биік қойып, ел игілігі үшін еңбек ететін азаматтар нағыз депутат деген атқа лайық, осындай азаматтар міндетті түрде халықтың сенімі мен құрметіне ие болады», – деді Мемлекет басшысы.

Сөз соңында Президент депутаттардың халық сеніміне нұқсан келтіретін әрекеттерден аулақ болуы тиіс екенін атап өтті.

«Депутат халықтың сеніміне сызат түсіретін әрекеттен аулақ болуы қажет. Өйткені мұндай әрекет бүкіл мемлекеттік аппараттың, тұтас билік жүйесінің беделіне нұқсан келтіреді», – деді Қасым-Жомарт Тоқаев.

Президент депутаттардың өз міндетін адал атқаратынына сенім білдірді.

«Сіздер осы жауапкершілікті дұрыс түсініп, терең сезініп, қызметтеріңізді адал атқара бересіздер деп кәміл сенемін», – деді Мемлекет басшысы.