Бүгін, 08:46
Қазақстан шоу-бизнесінде тағы бір даулы жағдай өршіп тұр. Әнші Bayansulu мен композитор Қуат Әбіл арасындағы авторлық құқыққа қатысты текетірес жаңа мәліметтермен толықты. Бұл жолы әнші өз позициясын ашық айтып, бұрынғы продюсер Әлішер Бурханов есімін де ортаға тастады, деп хабарлайды baq-orda.kz.
«Әр ән – 30 мың доллар»: талап па, әлде қысым ба?
Баянсұлудың айтуынша, ол ешқашан әндер үшін ақы төлеуден бас тартпаған. Бірақ күтпеген жерден бағаның бірнеше есе өсуі оны тығырыққа тіреген.
Композитор өзіне тиесілі әндердің әрқайсысын 30 мың долларға бағалаған. Мұндай сомма әнші үшін қолжетімсіз болғандықтан, ол әндерді өшіруге келісім берген. Нәтижесінде тректер YouTube платформасынан жоғалып кеткен.
15 млн теңгелік келісім неге күйреді?
Уақыт өте келе екі тарап мәмілеге келгендей болған. Барлық әндерді 15 млн теңгеге сатып алу туралы келісім жасалып, тіпті қол алысып бекітілген.
Алайда, әншінің сөзінше, арада небәрі 2 сағат өткен соң композитор өз шешімінен бас тартып, келісімді бұзған. Бұдан кейін әндерді барлық платформадан өшіру туралы мәлімдеп, желіде эмоциялық үндеу жариялаған.
Даудың тағы бір қызық тұсы — бұрынғы продюсердің рөлі.
Баянсұлу бұл процесте Әлішер Бурханов композитормен қаржылай емес, қымбат сыйлықтар арқылы есеп айырысқанын айтады. Тіпті, ол сыйлық табыстау сәтінің видеосын да жариялағанын жеткізді.
«Біз ақы жемейміз!» — әншінің жауабы
Әнші өзіне тағылған айыптарды жоққа шығарып, әндерді сатып алуға дайын болғанын нақты айтты:
«Біз сатып аламыз дедік! Біз ақы жемейміз! Еркектің қол бергені қазір қалай бағаланып жатыр?»
Оның айтуынша, ешкімнің еңбегін тегін пайдалану ойында болмаған.
Негізгі қателік — келісімшартсыз жұмыс
Баянсұлу «Ұмытсам да» әніне толық қаламақы төлегенін атап өтті. Бірақ сол кезде ресми келісімшарт жасалмағанын үлкен қателік деп мойындады.Қазір әнші жалған ақпарат таратқандарға қарсы заң аясында шара қолданатынын мәлімдеді. Сонымен қатар, композитор көрсеткен сот құжаты бұл әндерге қатысы жоқ деп, оны манипуляция деп атады.
