Бүгін, 10:31
Түркістан облысында өз әкесіне жүйелі түрде күш көрсеткен Алмас Садақбаев ісі қайта қаралып, сот үкімі қатаңдатылды. Енді ол бұрынғыдай 5 жыл емес, 7 жылға бас бостандығынан айырылды, деп хабарлайды baq-orda.kz.
Сот шешімі қылмыстың ауырлығын ескере отырып қабылданған. Іс материалдарына сәйкес, ер адам өз қарауындағы сырқат әкесіне күтім көрсетудің орнына, оған бірнеше мәрте күш қолданып, қорлаған. Тергеу барысында тұрмыстық зорлық-зомбылықтың бірқатар деректері толық дәлелденген.
Бұл оқиға қоғамда үлкен резонанс тудырған еді. Әлеуметтік желілерде тараған видеоларда ер адамның өз әкесін ұрып-соққаны анық көрініп, көпшіліктің ашу-ызасын туғызған.
Белгілі болғандай, Садақбаев 2025 жылдың мамыр айында Қоссейіт ауылынан үй сатып алып, өздігінен жүріп-тұра алмайтын 70 жастағы әкесін сол жерге көшірген. Алайда кейіннен оған тиісті күтім жасалмай, керісінше, аулада ұрып-соғу фактілері тіркелген.
Сот үкімі қоғамда зорлық-зомбылыққа төзбеушілік қағидатын тағы бір мәрте еске салды.
