23 маусым, 2026
Өңірдің даму деңгейі тек экономикалық көрсеткіштермен ғана емес, тұрғындардың мәдени өмірімен, бұқаралық спорттың қолжетімділігімен және туристік әлеуетінің артуымен де өлшенеді. Осы тұрғыдан алғанда Байзақ ауданында соңғы жылдары әлеуметтік инфрақұрылымды жаңғыртуға ерекше көңіл бөлініп, тұрғындардың бос уақытын тиімді ұйымдастыру мен ішкі туризмді дамытуға бағытталған бірқатар маңызды жобалар іске асырылуда, деп хабарлайды baq-orda.kz.
Ауданда бүгінде 44 мәдениет нысаны халыққа қызмет көрсетеді. Оның ішінде аудандық мәдениет үйі, ауылдық мәдениет үйлері, клубтар, кітапханалар және тарихи-өлкетану музейі бар. Мәдени инфрақұрылыммен қамту деңгейі жыл сайын артып келеді. Қазіргі таңда ондаған шығармашылық үйірмеде жүздеген жас өнер мен ұлттық мәдениетті насихаттауға атсалысып жүр. Бұл жастардың шығармашылық әлеуетін дамытуға және ауылдық жерлердегі мәдени өмірдің жандануына ықпал етуде.
Мәдениет саласын жаңғырту бағытындағы жұмыстар да жалғасып жатыр. Аудандық мәдениет үйі мен Түймекент ауылдық мәдениет үйін күрделі жөндеуден өткізу бойынша жобалар әзірленген. Оның ішінде аудандық мәдениет үйінің жөндеу жұмыстары басталғалы отыр. Заманауи талаптарға сай жаңартылатын бұл нысандар түрлі мәдени-көпшілік іс-шараларды жоғары деңгейде өткізуге мүмкіндік береді.
Байзақ ауданы туризмді дамытуға да ерекше мән беруде. Соңғы жылдары ауданға келетін туристер саны бірнеше есеге артқан. Бұған өңірдің табиғи ерекшелігі, тарихи орындары және жеке инвесторлардың қатысуымен жүзеге асырылып жатқан жаңа жобалар оң ықпал етуде. Қостөбе ауылдық округінде жеке инвестиция есебінен ірі туристік кешеннің құрылысы жүргізілуде. Жоба аясында этноауыл, демалыс үйлері, бассейн, ат спорты және балық аулау аймақтары ашылады. Болашақта кешен тәулігіне 400 туристі қабылдап, жылына 30 мыңға жуық қонаққа қызмет көрсетуге мүмкіндік береді. Сонымен қатар бұл жоба арқылы 50 жаңа жұмыс орны құрылмақ.
Туристік бағыттардың қолжетімділігін арттыру үшін инфрақұрылым да қатар дамып келеді. Былтыр «Алмалы Resort» демалыс аймағына дейінгі автомобиль жолы жөнделіп, келушілер үшін қолайлы жағдай жасалды. Мұндай жобалар өңірдің туристік тартымдылығын арттырып қана қоймай, жергілікті кәсіпкерліктің дамуына да серпін беруде.
Бұқаралық спортты дамыту бағытында да жүйелі жұмыстар атқарылып келеді. Аудан орталығында жаңа дене шынықтыру-сауықтыру кешені пайдалануға берілсе, бірнеше ауылда шағын футбол алаңдары мен балалар ойын алаңдары салынды. Нәтижесінде спортпен тұрақты айналысатын тұрғындардың үлесі жыл сайын өсіп келеді. Биылдың өзінде аудан көлемінде екі жүзге жуық спорттық іс-шара өткізіліп, оған он төрт мыңнан астам тұрғын қатысқан.
Аудан басшылығы халықпен ашық диалог орнатуға да басымдық беріп отыр. Жыл басынан бері ауданның барлық ауылдық округтерінде ондаған кездесу өткізіліп, тұрғындардың жүзден астам ұсынысы мен мәселесі қаралған. Көтерілген мәселелердің басым бөлігі оң шешімін тапса, қалғандары кезең-кезеңімен жүзеге асырылатын жоспарларға енгізілген. Бұл жергілікті билік пен тұрғындар арасындағы өзара сенімнің нығая түскенін көрсетеді.
Байзақ ауданында мәдениет, спорт және туризм салаларын дамытуға бағытталған жұмыстар өңірдің әлеуметтік әлеуетін арттырумен қатар, ауыл тұрғындарының өмір сапасын жақсартуға да ықпал етуде. Экономикалық өсіммен қатар рухани құндылықтарды, бұқаралық спортты және туристік мүмкіндіктерді қатар дамыту – ауданның ұзақмерзімді дамуының маңызды құрамдас бөлігіне айналып отыр.
