Бас мүфти Рамазан айында қазақ тілінде діни терминдерді қолдануға шақырды

«Жастарды діни терминдерді қазақша айтуға шақырамын. Өкініштісі, соңғы кезде кейбір жастар ауызашарды ифтар, сәресін сухур деп айтуда. Бұл көңілге қаяу түсіреді. Сан ғасырлар бойы мұсылман жолын ұстанған ата-бабамыз «ауызашар», «сәресі» деген сөздерді қолданған. Біз де бабалар жолын ұстанған ұрпақ ретінде өзге тілден енген діни терминдерден аулақ болып, қазақ тілін қолдансақ, – деді Наурызбай қажы Тағанұлы.

Бас мүфти сонымен қатар мұсылман қауымын Рамазан айында сауап жинауға, жақсылық жасауға шақырып, әрбір өнегелі іс сауапты болатынын атап өтті. Мысалы, саудагерлер азық-түлік бағасын төмендетіп, арақ-шарап сатудан бас тартса, жағдайы төмен отбасыларға көмек көрсетсе, бұл қоғамда қайырымдылық пен ізгілікті арттырады, – деді ол.