27 наурыз, 2026
Қазақстандық танымал вайнер әрі актер Мейржан Туребаев бостандыққа шыққаннан кейін алғаш рет әлеуметтік желіде жеке өміріне қатысты ашық пікір білдірді. Оның Instagram желісінде жарияланған видеосы қоғамда қызу талқыланып, автордың ішкі өзгерісі мен өмірге жаңа көзқарасын айқын көрсетті, деп хабарлайды baq-orda.kz.
Жарияланған жазбада Туребаев адамның қиын жағдайда берген уәделері мен еркіндікке шыққаннан кейінгі өмірі арасындағы қайшылыққа тоқталады. Оның айтуынша, адамдар ауыр кезеңде өз-өзіне түрлі серт береді: отбасына уақыт бөлу, денсаулыққа мән беру, өзін дамыту. Алайда уақыт өте келе бұл мақсаттар күнделікті күйбең тіршіліктің тасасында қалып қояды.
Автор өз өмірін мысалға ала отырып, дәл осындай жағдайды бастан өткергенін жасырмайды. Ол енді өзіне берген уәделерді орындауды басты қағида ретінде қабылдағанын атап өтеді. Сонымен қатар, өзгелердің пікіріне тәуелді болмау, қажет кезде «жоқ» деп айта білу дағдысын қалыптастырып жатқанын жеткізеді.
Айта кетейік, Мейржан Туребаев 2022 жылы қаржы пирамидасына қатысты іс аясында ұсталып, 2023 жылы сот үкімімен 5 жылға бас бостандығынан айырылған болатын. Бұл іс «Mudabarah Capital» атауымен белгілі болып, қоғамда кең резонанс тудырды.
2026 жылдың наурыз айында ол жазасын өтеп, бостандыққа шықты. Қазіргі таңда Туребаев әлеуметтік желілерге қайта оралып, өзінің өмірлік тәжірибесі, жеке трансформациясы және құндылықтар жүйесіндегі өзгерістер туралы жазбалар жариялауда.
