30 наурыз, 2026
Қазақстандық шоу-бизнесте тағы бір даулы жағдай көпшіліктің талқысына түсті. Танымал әнші Баянсұлу репертуарындағы хит әндердің авторы, композитор Қуат Әбіл ел алдына шығып, өзіне қатысты жағдайды ашық мәлімдеді, деп хабарлайды baq-orda.kz.
Композитордың айтуынша, ол әнші орындап жүрген бірнеше танымал туындының авторы болғанымен, ұзақ уақыт бойы еңбегіне лайық қаламақы алмаған. Бұл мәселені бейбіт жолмен шешуге тырысқанымен, нәтиже болмаған.
Қуат Әбілдің сөзінше, жағдай ушыға бастаған соң, ол заңды құқығын пайдаланып, өзіне тиесілі әндерді орындауға уақытша тыйым салған. Тіпті, кейбір әндер YouTube платформасынан өшірілген. Алайда кейін тараптар келісімге келіп, шығармалар қайта жүктелген.
Композитор даудың негізгі себебі ретінде қаржылық міндеттемелердің орындалмауын атап өтті. Оның айтуынша, әнші бұрынғы продюсерімен жұмысын тоқтатқаннан кейін жаңа командасымен бірге қайта байланысқа шыққан. Сол кезде Қуат Әбіл өзіне тиесілі қаламақыны төлеуді талап еткен. Бірақ күтпеген жерден өзі сотқа шақырту алғанын мәлімдеді.
Бұл жағдай композитор үшін үлкен соққы болған. Ол енді мәселені ашық айтып, халықтан әділдік сұрап отыр.
Әзірге Баянсұлу тарапынан ресми пікір жарияланған жоқ. Ал қоғам бұл дауға қатысты екі түрлі көзқарас білдіруде: бірі автор құқығын қорғау керек десе, екіншісі мәселені өзара келісіммен шешу қажет екенін алға тартады.
Қазіргі таңда дау қалай шешілетіні белгісіз. Дегенмен бұл жағдай өнер саласындағы авторлық құқық пен қаламақы мәселесінің өзектілігін тағы бір мәрте көрсетті.
