19 наурыз, 2026
Маңғыстау облысында saltanat.a.e.official лақап атымен танымал блогер әлеуметтік желіде ауқымды ұтыс ойын ұйымдастырғанын жариялады. Оның айтуынша, қатысушыларға екі автокөлік, пәтер, түрлі гаджеттер мен сыйлық жиынтықтары ұсынылады, деп хабарлайды baq-orda.kz.
Алайда ұтысқа қатысу үшін блогер 16 мың теңге тұратын шампунь сатып алуды міндетті шарт ретінде көрсеткен. Сатып алғаннан кейін қатысушылар «сәттілік барабанын» айналдырып, жүлдеге ие болу мүмкіндігіне ие болады.
Аталған жағдай қоғамда қызу талқыланып, заңдылық тұрғысынан сұрақтар туындады. Осыған байланысты Қаржылық мониторинг агенттігіне (АФМ) блогердің әрекетіне қатысты тексеріс жүргізу мүмкіндігі бойынша сұрау жолданғаны белгілі болды.
Қазіргі таңда ресми органдар тарапынан нақты шешім жарияланған жоқ. Егер заңбұзушылық белгілері анықталса, тиісті шаралар қабылдануы мүмкін.
