Бүгін, 09:54
Қазақстанның ТЖМ қызметкерлері еліміздің барлық өңірлерінде өскелең ұрпақ арасында қауіпсіздік мәдениетін қалыптастыру және құтқарушы мамандығын насихаттау бағытында жүйелі жұмысты жалғастыруда. Бүгінгі таңда 50-ден астам «Жас құтқарушы» сыныбы ашылып, онда шамамен 1000 оқушы білім алуда, деп хабарлайды baq-orda.kz ҚР Төтенше жағдайлар министрлігіне сілтеме жасап.
Маңғыстау облысының Түпқараған ауданында мектеп оқушылары «Жас құтқарушылар» қатарына қосылды. Е. Өмірбаев атындағы мектепте ашылған арнайы сынып оқушыларды төтенше жағдайлар кезіндегі іс-қимылдарға үйретуге, сондай-ақ жауапкершілік пен патриотизмді тәрбиелеуге бағытталған. Бағдарлама аясында оқушылар құтқару ісінің негіздерін меңгеріп, өрт қауіпсіздігі ережелерін оқиды, алғашқы медициналық көмек көрсету дағдыларын игереді және әртүрлі төтенше жағдайлар кезінде әрекет ету тәсілдерін пысықтайды.
Мамандандырылған сыныптарды ашу жұмыстары Батыс Қазақстан облысында жүргізілуде. Тек ағымдағы жылдың наурыз айында Шыңғырлау ауданында және Бәйтерек ауданының Достық ауылында «Жас құтқарушы» сыныптары ашылды. Құтқарушылар балаларға қызметтің ерекшеліктері, тәртіптің маңыздылығы, жауапкершілік және кез келген жағдайда әрекет етуге дайын болу туралы түсіндіреді. Сыныптар практикалық дағдыларды қалыптастыруға және қауіпсіздік мәдениетін дамытуға мүмкіндік беретін қажетті жабдықтармен жарақталған.
Ақтөбе қаласындағы №45 орта мектепте де «Жас құтқарушы» мамандандырылған сыныбы ашылды. Жоба оқушылардың төтенше жағдайларда әрекет ету дағдыларын дамытуға бағытталған. Оқу аясында оқушылар өмір қауіпсіздігінің негіздерін меңгеріп, төтенше жағдайларда көмек көрсету үшін қажет практикалық білім мен дағдылар алады.
Осындай бастамаларды жүзеге асыру жауапты, батыл және өмірдің кез келген жағдайына дайын азаматтарды тәрбиелеуге, сондай-ақ жастардың құтқарушы мамандығына тұрақты қызығушылығын қалыптастыруға ықпал етеді.
