Бүгін, 15:18
Қазақстанда энергетика саласын дамыту мақсатында жаңа су электр станцияларын салу жоспарланып отыр. Тиісті жобаларды Су ресурстары және ирригация министрлігі әзірлеген, деп хабарлайды baq-orda.kz.
Жоспарға сәйкес, үш бірдей су электр станциясы елдің әр өңірінде бой көтереді. Атап айтқанда, нысандар Қарағанды облысы аумағындағы Самарқанд су қоймасында, Ақтөбе облысы өңіріндегі Қарғалы су қоймасында және Абай облысы аумағындағы Қаракөл су қоймасында орналасады.
Қазіргі таңда аталған жобалар мемлекеттік сараптамадан өтіп жатыр. Бұл – құрылысты бастау алдындағы маңызды кезеңдердің бірі.
Сонымен қатар, министрлік алдағы уақытта тағы бес су шаруашылығы нысаны бойынша жобалау-сметалық құжаттарды әзірлеуді жоспарлап отыр.
Мамандардың айтуынша, жаңа су электр станциялары өңірлердің энергиямен қамтылуын жақсартып қана қоймай, су ресурстарын тиімді пайдалануға да мүмкіндік береді.
