16 сәуір, 2026
Қазақстанда әлемдік жұлдыздардың концерті өтеді деген ақпарат жұртты қызықтырып жатқан тұста, концерт ұйымдастырушысы Алексей Пучков бұл тақырыпқа қатысты пікір білдірді, деп хабарлайды baq-orda.kz.
Оның айтуынша, Shakiraны Қазақстанға шақыру бойынша келіссөздер біраз уақыттан бері жүргізіліп келеді. Алайда нақты келісім әлі жасалмаған. Бұған басты себеп — әнші командасының қатаң талаптары.
Ұйымдастырушының сөзінше, концерт өтетін алаң кемінде 50 мың көрерменге арналған болуы керек. Сонымен қатар, жұлдыздың гонорары шамамен 7,5 миллион долларды құрайды. Мұндай жағдайда концерттің қаржылық тұрғыдан қаншалықты тиімді болатыны күмән тудырады.
Дегенмен, қазақстандық тараптың қызығушылығы сақталып отыр. Яғни келіссөздер толық тоқтаған жоқ, бірақ нақты нәтиже де жоқ.
Ал Eminemге қатысты жағдай өзгеше. Алексей Пучковтың айтуынша, рэпер қазіргі уақытта тек Қазақстанға емес, жалпы гастрольдік сапарларға шығуға аса ниетті емес.
Айта кетейік, бұған дейін БАҚ-та 2026 жылы Қазақстанда әлемдік деңгейдегі жұлдыздардың концерті өтетіні туралы ақпарат тараған еді. Тіпті Алматыдағы Орталық стадионда ірі концерт ұйымдастыру жоспарланғаны айтылған. Алайда әзірге бұл жоспарлар нақты жүзеге асқан жоқ.
