Бүгін, 09:14
Елімізде маңдай терін төгіп, адал еңбегімен көпке үлгі болып жүрген абыройлы азаматтар аз емес. Солардың бірі – Жуалы ауданының тұрғыны, сушаруашылығы саласының білікті маманы Дәулетбай Мырзайұлы Нұрабаев. Ол жарты ғасырға жуық уақыт бойы осы салада табанды еңбек етіп, кәсібилігімен де, адамгершілік болмысымен де құрметке ие болған тұлға, деп хабарлайды baq-orda.kz.
Дәулетбай Нұрабаев еңбек жолын 1984 жылы «Қазсушар» республикалық мемлекеттік кәсіпорны Жамбыл филиалының Жуалы аудандық «Ақсай» өндірістік бөлімшесінде су бақылаушы қызметінен бастаған. Іскерлігі мен жауапкершілігінің арқасында қызмет сатысымен көтеріліп, канал учаскесінің басшысы атанды. Ал 2000 жылдан бері «Ақсай» өндірістік бөлімшесінің басшысы ретінде абыройлы қызмет атқарып келеді.
Ол 1963 жылы Жуалы ауданына қарасты Қайрат ауылында дүниеге келген. Жастайынан еңбекке бейім болып өскен Дәулетбай Мырзайұлы №2 Мыңбұлақ орта мектебін жақсы аяқтап, білімін Жамбыл гидромелиоративтік құрылыс институтында жалғастырды. Инженер-гидротехник мамандығын меңгеріп, еңбек жолында тәжірибелі мамандардан тәлім алып, кәсіби шеберлігін шыңдай түсті. Уақыт өте келе өзі де жас мамандарға бағыт-бағдар беретін тәлімгерге айналды.
Бүгінде оның тәрбиесін көрген шәкірттері сушаруашылығы саласында табысты еңбек етіп жүр. Бұл – оның ұстаздық еңбегінің айқын нәтижесі.
«Ақсай» өндірістік бөлімшесі аудан экономикасында маңызды рөл атқарады. Бөлімше арқылы 7 мың гектардан астам егістік алқап суарылады. Суару маусымында жүздеген шаруашылық «Көксай», «Ақсай» және «Тихий» каналдары арқылы тұрақты түрде сумен қамтамасыз етіледі. Бұл өз кезегінде өңірдегі ауыл шаруашылығының дамуына және өнімділіктің артуына оң әсерін тигізіп отыр.
Саланы дамыту бағытында да жүйелі жұмыстар жүргізілуде. Каналдар жаңғыртылып, инфрақұрылым жақсартылған. Бұл – ұжымның бірлескен еңбегі мен басшының тиімді ұйымдастырушылық қабілетінің нәтижесі.
Дәулетбай Нұрабаевтың еңбегі мемлекет тарапынан жоғары бағаланған. Ол «Сушаруашылығы саласының ардагері» медалімен, «Қазақстан Тәуелсіздігіне – 25 жыл» мерекелік медалімен марапатталған. Сонымен қатар, кәсіби мерекесі қарсаңында «Құрмет» орденіне ие болды. Бұл – ұзақ жылғы адал еңбектің заңды жемісі.
Өз сөзінде ол жетістіктерін жеке еңбегінің ғана емес, бүкіл ұжымның ортақ табысы деп біледі. Сондай-ақ, жас мамандарға білгенін үйретуді азаматтық парызы санайды.
Отбасында да өнегелі әке атанған азамат жары Анар Болысбекқызымен бірге төрт бала тәрбиелеп өсірген. Ұлы Жанболат әке жолын жалғап, бүгінде сушаруашылығы саласында еңбек етуде.
Адал еңбекті өмірлік ұстанымына айналдырған Дәулетбай Нұрабаевтың өмір жолы – кейінгі буынға үлгі. Расында да, табандылық пен жауапкершілік, еңбекке деген құрмет адамды абырой биігіне жетелейді.
