Бүгін, 10:00
Танымал әнші Димаш Құдайбергеннің анасы Света Айтбаева әлеуметтік желідегі парақшасында қыз ұзатуға байланысты ұмытылып бара жатқан дәстүр жайлы жазба жариялады, деп хабарлайды baq-orda.kz.
Ол бұрын қыз ұзату тойларының күндіз өткізілетінін айтып, оның астарында терең мағына жатқанын жеткізді.
«Қазақ қыз баланы түс ауғанша ұзатқан. Оның өзіндік терең мағынасы бар. Соңғы жылдары түнгі 12-де мейрамханадан шығарып жіберетін әдет пайда болды. Мүмкін уақытты үнемдеудің шарасы болар», — деп жазды Света Айтбаева.
Сондай-ақ ол өз өңіріндегі қыз ұзату дәстүрінің қалай өтетінін де баяндады.
«Біздің өңірде той өткен соң ертеңіне арнайы қой сойып, қыз бен күйеуге, құдаларға қонақасы беріледі. “Қыз — қонақ” деген сөз осы дәстүрге қатысты да айтылған болуы керек. Әкесінің босағасынан алғаш рет қонақ ретінде арнайы қонақасын жеп, өз жұртына аттанады», — деді ол.
Айтуынша, қыздың таң нұрымен, елдің батасын алып аттануы — ежелден келе жатқан ырымдардың бірі.
«Маңдайы ашық болсын деп, таң нұрына, күн сәулесіне бөленіп, ел-жұртының батасын алып өз босағасынан шығады. Жеңгелері құдалардың көрімдігін алып, қыз жасауын көшке тиейді.
“Құда тартар” салтын жасап, әзіл-қалжыңмен, ақ батамен, сән-салтанатымен қызды шығарып салады. Міне, біз де Раушантайды ата-баба салған жолмен, сол дәстүрден ауытқымай ұзаттық. Сол керемет сәтті еске түсірген әдемі сурет», — деп бөлісті Света Айтбаева.
Желі қолданушылары бұл жазбаға қатысты жылы пікір білдіріп, қазақы салт-дәстүрдің сақталғанына ризашылықтарын жеткізген.
