Бүгін, 09:50
Жамбыл облысында кітап оқуға деген қызығушылық сақталып отыр. 2026 жылдың қаңтар-қыркүйек айларында Ш. Уәлиханов атындағы Жамбыл облыстық әмбебап ғылыми кітапханасына 17 404 жаңа оқырман тіркелді.
Есепті кезеңде кітапханаға келушілер саны 148 023 адамды құрады. Оқырмандарға 313 043 дана кітап берілген. Оның 242 648 данасы мемлекеттік тілдегі әдебиеттер.
Қазіргі таңда кітапхана қорында 276 051 дана әдебиет бар. Оның ішінде мемлекеттік тілдегі кітаптардың саны – 97 587 дана. Бұл ретте кітап қоры дәстүрлі басылымдармен қатар цифрлық ресурстармен де толықтырылып келеді.
Кітапхана қызметінің цифрлық бағыты да кеңейіп келеді. «Aulieata library» мобильді қосымшасы арқылы оқырмандар электронды кітаптарды смартфоннан оқи алады. Бүгінде қосымшаға 134 автордың 385 кітабының электронды нұсқасы енгізілген.
Сонымен қатар құнды әдеби мұраны сақтап, оны көпшілікке қолжетімді ету мақсатында кітаптарды цифрландыру жұмыстары жүргізілуде. «Қасиетін жоймаған құнды кітаптарды цифрландыру» жобасы аясында қордағы 1021 құнды және сирек кітаптың 363-і цифрландырылды. Ал «Шоқан асулары» жобасы бойынша 47 кітаптың электронды нұсқасы дайындалды.
Кітапхана жұмысы әлеуметтік желілерде де белсенді жүргізіледі. Есепті кезеңде Facebook және Instagram парақшаларындағы жарияланымдардың жалпы қаралымы 11 842 649-ға жетті. Оның 6,3 миллионы Facebook, 5,5 миллионы Instagram желісіне тиесілі.
Оқырмандардың қызығушылығын арттыру мақсатында жыл басынан бері кітапханада 193 іс-шара ұйымдастырылды. Оның 122-сі офлайн, 71-і онлайн форматта өтті. Жалпы іс-шараларға 273 841 оқырман қамтылды.
Кітапхана қызметі тек облыс орталығымен шектелмейді. «Кітап оқитын ұлт», «Ел болып оқимыз», «Жазушымен бір күн» секілді жобалар өңірдің аудандық кітапханаларында да жүзеге асырылуда.
Жалпы, 9 айдағы көрсеткіштер кітапхана жұмысының дәстүрлі қызметпен қатар цифрлық форматқа да бейімделіп келе жатқанын көрсетеді. Электронды кітаптар, цифрландырылған сирек басылымдар, мобильді қосымша және әлеуметтік желілер арқылы кітапхана оқырманмен байланыстың жаңа тәсілдерін қалыптастырып отыр.
