Бүгін, 18:39
Жамбыл облысында 2026 жылғы көктемгі мерзімді әскери қызметке шақыру науқаны белгіленген жоспарға сай кезең-кезеңімен жүзеге асырылып жатыр. Бұл – елдің қорғаныс қабілетін қамтамасыз етудегі маңызды міндеттердің бірі әрі әрбір азаматтың конституциялық борышы, деп хабарлайды baq-orda.kz.
Науқан аясында жергілікті атқарушы органдар, қорғаныс істері жөніндегі басқармалар мен бөлімдер, сондай-ақ медициналық ұйымдар бірлесе отырып, шақырылушыларды іріктеу, медициналық куәландыру және әскер қатарына жөнелту жұмыстарын жүйелі түрде жүргізуде. Сонымен қатар, Ұлттық қауіпсіздік комитетінің Шекара қызметін жас сарбаздармен толықтыру да қатар атқарылуда.
Қолданыстағы заң талаптарына сәйкес, әскерге шақырудан кейінге қалдыру немесе босату нақты негіздер бойынша ғана қарастырылады. Атап айтқанда, білім алу, денсаулық жағдайы, отбасылық себептер және өзге де заңда белгіленген жағдайлар ескеріледі. Мұндай шешімдер тек шақыру комиссиясының қорытындысымен қабылданып, ұсынылған құжаттар жан-жақты тексеріледі.
Шақыру науқанының ашық әрі әділ өтуіне ерекше мән берілген. Медициналық тексеру бірнеше кезеңнен тұрады, ал қажет болған жағдайда қосымша тексерулер тағайындалады. Сонымен бірге, азаматтардың өтініштері мен шағымдарын қарау тетіктері жұмыс істейді, бұл өз кезегінде процестің айқындылығын қамтамасыз етеді.
Биылғы көктемгі шақыру барысында Жамбыл облысынан шамамен 1500-ге жуық азаматты мерзімді әскери қызметке жіберу жоспарланған. Оның ішінде 830 азамат Қарулы Күштер құрамына, 150 – Ұлттық қауіпсіздік комитетінің Шекара қызметіне, 500 – Ұлттық ұлан қатарына, 20 – Төтенше жағдайлар министрлігіне, ал 22 азамат Мемлекеттік күзет қызметіне жолданады.
Әрбір шақырылушының жағдайы жеке қаралады. Денсаулығы, білім деңгейі, отбасылық және әлеуметтік ахуалы толық ескеріліп, тиісті шешімдер заң аясында қабылданады. Бұл – азаматтардың құқықтарын сақтаудың басты кепілі.
Сонымен қатар, әскери қызметтен жалтарған азаматтарға заң аясында жауапкершілік көзделген. Әкімшілік құқықбұзушылық туралы кодекстің 647-бабына сәйкес, шақыру қағазын алғанына қарамастан себепсіз келмеген азаматқа бес айлық есептік көрсеткіш мөлшерінде айыппұл салынады. Ал әскерге шақырудан әдейі жалтару немесе жалған мәлімет ұсыну фактілері анықталған жағдайда, Қылмыстық кодекстің 387-бабына сәйкес бір мыңнан үш мың айлық есептік көрсеткішке дейін айыппұл салу, қоғамдық жұмыстарға тарту немесе бір жылдан үш жылға дейін бас бостандығынан айыру жазасы қарастырылған.
Жалпы, көктемгі шақыру науқаны белгіленген талаптарға сай ұйымдастырылып, азаматтардың құқықтарын сақтай отырып жүргізілуде. Әскери қызмет – ел алдындағы жауапкершілік пен міндеттің нақты көрінісі.
