23 сәуір, 2026
Қоғамның тұрақтылығы мен азаматтардың қауіпсіз өмір сүруі ең алдымен заң мен тәртіптің сақталуына тікелей байланысты. Осы қағидатты негізге ала отырып, құқық қорғау органдары жүйелі әрі кешенді жұмыстар жүргізуде. Нәтижесінде қоғамдық қауіпсіздік нығайып, құқық бұзушылықтардың алдын алу бағытында нақты оң өзгерістер байқалуда, деп хабарлайды baq-orda.kz.
2026 жылдың алғашқы тоқсанында жүргізілген жұмыстардың қорытындысы соның айқын дәлелі. Құқық бұзушылықтардың алдын алу, халықтың құқықтық сауаттылығын арттыру және қоғамдық тәртіпті қамтамасыз ету бағытында мемлекеттік органдар мен қоғамдық ұйымдардың бірлескен әрекеті тиімді нәтиже берді.
Әсіресе отбасы-тұрмыстық қатынастар саласында оң динамика қалыптасты. Бұл бағыттағы қылмыстар саны 52,2 пайызға төмендеп, 32 дерекке дейін азайды. Сонымен қатар, профилактикалық жұмыстар күшейтіліп, мыңнан астам азамат әкімшілік жауапкершілікке тартылды. Қорғау нұсқамалары мен ерекше талаптардың белгіленуі де құқық бұзушылықтардың алдын алуға ықпал етті.
Қоғамдық тәртіпті сақтау бағытында да нәтижелі шаралар жүзеге асырылуда. Масаң күйде жасалатын қылмыстардың 33,6 пайызға төмендеуі – осының дәлелі. Ал «Арақсыз ауыл» жобасының 54 елді мекенде іске асырылуы тұрғындардың қауіпсіз әрі салауатты өмір салтын қалыптастыруға мүмкіндік беріп отыр.
Жас ұрпақтың қауіпсіздігі де басты назарда. Балаларға қатысты қылмыстар 17,9 пайызға азайып, білім беру ұйымдарында профилактикалық жұмыстар күшейтілді. Мектептер мен колледждерге полиция қызметкерлерінің бекітілуі жасөспірімдер арасындағы құқық бұзушылықтардың алдын алуда маңызды рөл атқаруда.
Сонымен қатар, құқықтық түсіндіру жұмыстары кең көлемде жүргізілуде. Мыңдаған дәрістер, бейнероликтер мен ақпараттық материалдар арқылы халықтың құқықтық мәдениеті артып келеді. Бұл – құқық бұзушылықтың алдын алудың ең тиімді жолдарының бірі.
Экологиялық тәртіпті сақтау да назардан тыс қалған жоқ. «Таза Қазақстан» акциясы аясында жүздеген заңсыз қоқыс орындары анықталып, оларды жою бойынша нақты шаралар қабылданды. Бұл бастама қоршаған ортаны қорғаумен қатар, қоғамдағы жауапкершілік мәдениетін қалыптастыруға ықпал етуде.
Жалпы алғанда, қабылданған шаралар өңірдегі криминогендік жағдайды тұрақтандырып, қоғамдық қауіпсіздікті нығайтуға оң әсерін тигізуде. Заң мен тәртіпті сақтау – тек құқық қорғау органдарының ғана емес, бүкіл қоғамның ортақ міндеті. Осы бағыттағы бірлескен жұмыс жалғаса берсе, қауіпсіз әрі әділетті қоғам құруға толық мүмкіндік бар.
