Бүгін, 16:48
Жанабыловтар ісі бойынша сот отырысында жүлде ұтысын өткізуге арналған сайтты әзірлеген IT-маман Сұңғат Өтеболатов куәгер ретінде жауап берді. Ол сотта жобаның қалай жасалғанын және оған қандай тапсырма берілгенін айтып өтті, деп хабарлайды baq-orda.kz.
Куәгердің айтуынша, ол қатысушылардың жүлде ұтып алу процесін көрсетуге арналған арнайы платформаны әзірлеген. Сайтта пайдаланушылар “сәттілік барабаны” деп аталатын функцияны айналдырып, ұтыс нәтижесін көре алатын мүмкіндік болған.
Сұңғат Өтеболатов бұл жобаны жасауға келісімшарт негізінде тартылғанын жеткізді. Оның сөзінше, жобаның жалпы құны шамамен 10 миллион теңге болады деп айтылған. Алайда ол бұл соманың толық көлемін алмағанын мәлімдеді.
“Жобаның жалпы құны 10 миллион теңге болады деп айтылды. Соның мен шамамен 7 немесе 8 миллион теңгесін алдым”, – деді IT-маман сот барысында.
Сонымен қатар куәгер атқарған жұмысы үшін келісілген қаражаттың толық төленбегенін айтты. Оның айтуынша, платформа техникалық тұрғыдан дайындалып, пайдалануға берілгенімен, еңбекақының бір бөлігі төленбей қалған.
Қазіргі уақытта сот процесі жалғасып жатыр. Іс бойынша куәгерлердің жауаптары тыңдалып, барлық мән-жай анықталуда.
