Бүгін, 08:44
Атырауда бірнеше адамның өліміне қатысты айыпталып жатқан Сұлтан Сәрсемалиевтің ісі бойынша сот отырысы жалғасуда. Кезекті отырыста айыпталушы жәбірленуші тарап пен прокурордың сұрақтарына жауап беруден бас тартып, тек судья мен қорғаушысының сауалдарына жауап беруге келісті, деп хабарлайды baq-orda.kz.
Сотта Сәрсемалиев болған оқиғаға қатысты өз нұсқасын айтып берді. Оның сөзінше, қайын жұртымен арадағы келіспеушіліктер ұзақ уақыт бойы жалғасқан. Айыпталушы ата-енесі отбасылық өміріне араласып, жұбайымен арадағы қарым-қатынасқа әсер еткенін мәлімдеді.
Сәрсемалиевтің айтуынша, ресми түрде ажырасқанымен, бұрынғы жұбайымен араласуын тоқтатпаған. Ол сондай-ақ туыстары тарапынан өзін қорлау мен қысым көрсету жағдайлары болғанын алға тартты.
Сот барысында айыпталушы қайын ағасы Наурыз Мақсотұлымен болған жанжал кезінде өзін қорғау мақсатында әрекет еткенін айтты. Оның сөзінше, сол сәтте өз өміріне қауіп төнді деп есептеген.
Сонымен қатар Сәрсемалиев қайын атасы мен енесінің өліміне қатысты кінәсін мойындады. Ол мәйіттерді жасыру әрекеттері алдын ала ойластырылғанын да жасырмады.
Айыпталушы қайын бикесі Мейрамгүл Мақсотқызының өліміне қатысты да түсініктеме беріп, ұзақ жылдар бойы жиналған реніш пен өшпенділіктің әсерінен әрекет еткенін мәлімдеді.
Сот отырысында Сұлтан Сәрсемалиев өзіне тағылған айыптарды толық мойындайтынын айтты. Алайда ол жасаған әрекеттеріне өкінбейтінін жеткізді.
Сондай-ақ айыпталушы оқиғадан кейін Түркияға барғанын, кейін Меккеге сапар шеккенін баяндады. Оның сөзінше, сол кезеңде өмірі туралы ауыр ойларға берілген.
Қазіргі уақытта атышулы іс бойынша сот процесі жалғасуда. Соңғы шешімді сот үкім шығару кезінде қабылдайды.
