Экологиялық бастамаға шамамен 60-қа жуық белсенді жас қатысты. Олар аурухана айналасын, қала көшелері мен канал маңдарын тазалап, қоршаған ортаның тазалығына өз үлестерін қосты. Сонымен қатар, тұрғындарға экологияның маңызы, табиғатты күтіп-баптаудың қажеттілігі туралы түсіндіру жұмыстары жүргізілді.

Тараз қалалық жастар ресурстық орталығының директоры Абзал Есіркепов акцияның қоғам үшін маңызын атап өтті:
– «Таза табиғат – ұлт болашағының кепілі. Жастардың осындай игі істерге белсенді араласуы олардың азаматтық ұстанымының айғағы. Бұл бастамалар арқылы біз табиғатты қорғап қана қоймай, қоғамның экологиялық мәдениетін де қалыптастырамыз», – деді ол.

Шара барысында «Жасыл ел» еңбек жасақтары мен еріктілер ұйымшылдық пен ынтымақтың жарқын үлгісін көрсетті. Олар тек тазалық жұмыстарына қатысып қана қоймай, экологиялық мәдениетті насихаттауға да атсалысты. Акция қатысушысы Шәрбану Жамбылқызының айтуынша:
– «Табиғатты қорғау – әр азаматтың парызы. Біздің ортақ күш-жігеріміз қоршаған ортаны жақсартып қана қоймай, болашақ ұрпаққа өнеге болады. Осындай бастамалар жастарды рухани тұрғыда байытып, елге деген сүйіспеншілігін арттырады», – деді ол.

Бұл акция – «Таза Қазақстан» ұлттық жобасының аясында өткізілген маңызды шаралардың бірі. Ол Тараз қаласының көркін айқындап, қоғамның экологиялық мәдениетке деген көзқарасын жаңартуға ықпал етті.
Жастардың бірлігі мен белсенділігі арқасында жүзеге асқан бұл игі іс – таза орта мен жарқын болашаққа бағытталған нақты қадам болды.