Осы бағыттағы тың бастамалардың бірі – «Ақылды үй» жобасы. Жамбыл облысы, Айша бибі ауылындағы орта мектептің математика пәні мұғалімі Салтанат Теміржанова қауіпсіздікке, үнемділікке және экологиялық тазалыққа бағытталған жасанды интеллектке негізделген «Ақылды үй» жобасын ұсынды.

Педагог-зерттеушінің айтуынша, ақылды үй – бұл заманауи технологиялармен жабдықталған, тұрмыстық құрылғыларды автоматты немесе қашықтан басқаруға мүмкіндік беретін жүйе. Мұнда жарықтандыру, жылыту, сумен қамту, қауіпсіздік жүйелері мен тұрмыстық техника бір орталықтан басқарылып, үйлесімді жұмыс істейді. Жобаның басты өзегі – жасанды интеллект. Ол адамның күнделікті әдеттерін талдап, үй ішіндегі жүйелерді соған сай реттеп отырады.

Жасанды интеллекттің ақылды үйдегі рөлі өте ауқымды. Біріншіден, автоматтандыру арқылы жарық, жылу және су ресурстары адамның қатысуынсыз-ақ реттеледі. Екіншіден, жүйе тұрғындардың өмір салтына бейімделіп, олардың қажеттіліктеріне сай жұмыс істейді. Үшіншіден, қауіпсіздік бағыты бойынша бейнебақылау жүргізіп, өрт, газдың шығуы немесе басқа да төтенше жағдайларды дер кезінде анықтай алады. Сонымен қатар, дауыс арқылы басқару мүмкіндігі смарт-ассистенттер арқылы үйді басқаруды барынша жеңілдетеді. Ең маңыздысы – энергияны үнемдеу. Жүйе артық шығынның алдын алып, ресурстарды тиімді пайдалануға көмектеседі.

Салтанат Қайратқызының айтуынша, «Ақылды үй» жобасының негізгі мақсаты – күнделікті тұрмысты жеңілдету, қауіпсіздікті арттыру, уақыт пен энергияны үнемдеу, сондай-ақ смарт-технологияларды өмірімізге кеңінен енгізу. Бұл жоба жасанды интеллекттің мүмкіндіктерін нақты өмірде қолданудың жарқын үлгісі болып табылады.

Қорытындылай келе, ақылды үй мен жасанды интеллект – болашақтың емес, бүгінгі күннің шындығы. Мұндай технологиялар адамның өмір сапасын жақсартып, оны жайлы, қауіпсіз әрі тиімді етеді. Энергияны үнемдеу арқылы экологияны қорғауға және елдің тұрақты дамуына үлес қосу – осындай инновациялық жобалардың басты артықшылығы.