Ағымдағы жылдың 11 айында Кәсіпкерлер палатасына бизнесті қорғау желісі бойынша 78 өтініш келіп түсті. Оның ішінде бірқатар мәселелер оң шешімін тауып, қалғаны мемлекеттік органдармен бірлесіп қаралды. Кәсіпкерлер тарапынан көтерілген өтініштердің басым бөлігі жер қатынастары, мемлекеттік сатып алу, білім беру және ауыл шаруашылығы салаларына қатысты болды. Нәтижесінде 2,8 млрд теңге көлеміндегі мүліктік құқықтар қорғалды, бұл өткен жылмен салыстырғанда өсімді көрсетеді.

Жергілікті атқарушы органдардан келіп түскен нормативтік-құқықтық акт жобаларына жүргізілген сараптама да кәсіпкерлік мүдделерін қорғауда маңызды рөл атқарды. Палатаға 112 жоба ұсынылып, олардың бір бөлігіне ұсыныстар беріліп, кәсіпкерлердің құқығын шектейтін нормалардың алдын алу қамтамасыз етілді. Сонымен қатар, Палата жанындағы Кәсіпкерлердің құқықтарын қорғау жөніндегі кеңестің жұмысы шеңберінде бірқатар жүйелі мәселелер қаралып, нақты шешімдер қабылданды, жауапты тұлғалар тәртіптік жауапкершілікке тартылды.

Палата сот процестеріне де белсенді қатысып, кәсіпкерлердің мүддесін қорғауға үлес қосты. 2025 жылы қатысқан сот істерінің нәтижесінде 201 млн теңгеден астам қаражат көлемінде бизнес субъектілерінің құқықтары қорғалды. Облыстық прокуратурамен бірлескен жұмыс та нақты нәтижелер берді. Коммуналдық кәсіпорындармен, субсидиялау мәселелерімен және білім беру саласындағы заңсыз талаптармен байланысты жүздеген кәсіпкердің құқығы қалпына келтірілді.

Инвестициялық климатты жақсарту бағытында да жүйелі жұмыс жүргізілуде. Жамбыл облысында 2025–2028 жылдарға арналған 82 инвестициялық жоба қалыптастырылған, олардың жалпы құны 3,6 трлн теңгені құрайды. Бұл жобалар мыңдаған жаңа жұмыс орындарын ашуға мүмкіндік береді. Палата инвестициялық жобаларды іске асыру кезеңінде туындайтын мәселелерді Ұлттық кәсіпкерлер палатасының цифрлық платформалары арқылы тұрақты түрде мониторингтеп, инвесторлармен және мемлекеттік органдармен тікелей жұмыс жүргізіп келеді. Соның нәтижесінде ірі өнеркәсіптік және өндірістік жобалар бойынша жер, экология, инженерлік инфрақұрылым мәселелері шешімін тапты.

Өңірлік экономиканың негізгі салалары бойынша құрылған салалық және салааралық кеңестер кәсіпкерлер мен мемлекеттік органдар арасындағы тиімді диалог алаңына айналды. Кеңестер аясында жүзден астам мәселе қаралып, олардың едәуір бөлігі нақты шешімдермен аяқталды. Сонымен қатар, әртүрлі бағыттар бойынша меморандумдар жасалып, серіктестік пен институционалдық байланыстар нығайтылды.

2025 жылы бизнес пен қылмыстық-атқару жүйесі арасындағы өзара іс-қимыл да жаңа мазмұнға ие болды. Кәсіпкерлердің қатысуымен ҚАЖ мекемелерінде өндірістер ұйымдастырылып, сотталғандарды жұмыспен қамту кеңейтілді. Бұл бағыттағы жұмыстар әлеуметтік маңызы бар нәтижелер беріп, еңбек арқылы қайта бейімделу тетіктерін дамытуға мүмкіндік берді.

Адам капиталын дамыту да Палатаның негізгі басымдықтарының бірі болып қала береді. Жүргізілген сауалнамалар өңір экономикасы үшін мыңдаған маманға қажеттілікті көрсетті. Дуалды оқыту жүйесі, қысқа мерзімді курстар және оқу орталықтары арқылы жүздеген адам еңбек нарығына дайын кадр ретінде қосылды. Жұмысшы мамандықтарын дәріптеу аясында оқушылар мен студенттерге арналған іс-шаралар, чемпионаттар мен өндірістік экскурсиялар ұйымдастырылды.

Қаржылық емес қолдау көрсету аясында мыңдаған кәсіпкер мен кәсіпкерлік бастамасы бар азаматтар кеңес, сүйемелдеу және оқыту қызметтерін алды. Сонымен қатар, ауыл кәсіпкерлігін дамытуға бағытталған «Бір ауыл - бір өнім» жобасы өңірде нақты нәтижелерін көрсетіп, қатысушылардың өнім сапасын арттыруға және нарыққа шығуына жол ашты.

Жалпы алғанда, Жамбыл облысы Кәсіпкерлер палатасының 2025 жылғы 11 айдағы жұмысы өңірлік кәсіпкерлікті қолдаудың жүйелі әрі нәтижеге бағытталған моделінің қалыптасқанын көрсетеді. Қорғалған құқықтар, іске асқан инвестициялық жобалар, дайындалған кадрлар мен күшейген серіктестік  - мұның бәрі өңір экономикасының тұрақты дамуына берік негіз болып отыр.